غیر اعلانیہ لوڈشیڈنگ کا جن بے قابو، شارٹ فال 1000میگاواٹ تک پہنچ گیا

لاہو (پی این پی) صوبائی دارالحکومت لاہور میں ایک بار پھر غیر اعلانیہ لوڈشیڈنگ نے سر اٹھا لیا۔

لیسکو ریجن کے مختلف علاقوں میں بجلی کی بندش کا سلسلہ شروع ہو چکا ہے اور متعدد مقامات پر روزانہ 2سے 3گھنٹے تک بجلی غائب رہنے لگی ہے۔ذرائع کے مطابق شہر میں خصوصاً شام اور رات کے اوقات میں لوڈشیڈنگ میں اضافہ دیکھا جا رہا ہے جبکہ دن کے وقت سولر سسٹمز کے باعث کسی حد تک بجلی کی طلب پوری ہو رہی ہے تاہم مجموعی صورتحال اب بھی تشویشناک ہے۔اعداد و شمار کے مطابق لیسکو کو اس وقت تقریباً 2000میگاواٹ بجلی فراہم کی جا رہی ہے جبکہ طلب 2990میگاواٹ تک پہنچ چکی ہے، جس کے باعث شارٹ فال تقریباً 1000میگاواٹ ہو گیا ہے۔شہری علاقوں میں 2سے 3گھنٹے جبکہ دیہی علاقوں میں 4سے 5گھنٹے تک بجلی کی بندش رپورٹ کی گئی ہے، فضائیہ ہائوسنگ، اڈا پلاٹ، جوہر ٹائون، اقبال ٹائون، گلشن راوی، سمن آباد، ہربنس پورہ اور کوٹ خواجہ سعید سمیت کئی علاقوں میں لوڈشیڈنگ کا سلسلہ جاری ہے۔

بجلی کی غیر اعلانیہ بندش سے شہری شدید پریشانی کا شکار ہیں اور متعلقہ حکام سے فوری نوٹس لینے کا مطالبہ کر رہے ہیں۔