ڈرائیونگ لائسنس بنوانے والوں کی بڑی مشکل آسان ہوگئی

اسلام آباد (نیوزڈ یسک) پشاور میں جدید سہولیات سے مزین اور مکمل طور پر ڈیجیٹل نظام پر مشتمل ڈرائیونگ لائسنس برانچ کا افتتاح کر دیا گیا ہے،

جس کے بعد شہریوں کو لمبی قطاروں اور غیر ضروری انتظار سے نجات ملے گی۔تفصیلات کے مطابق خیبر پختونخوا کے انسپکٹر جنرل پولیس ذوالفقار حمید نے ٹریفک ہیڈکوارٹرز پشاور میں اس نئی طرز کی ڈیجیٹل لائسنس برانچ کا باقاعدہ افتتاح کیا۔ یہ اقدام “ون ونڈو سسٹم” کے تحت متعارف کرایا گیا ہے تاکہ تمام خدمات ایک ہی جگہ پر فراہم کی جا سکیں۔افتتاح کے موقع پر آئی جی پی کی آمد پر سٹی ٹریفک پولیس کے دستے نے انہیں سلامی دی، جبکہ انہوں نے یادگارِ شہداء پر حاضری دے کر پھولوں کی چادر چڑھائی اور فاتحہ خوانی بھی کی۔چیف ٹریفک آفیسر زاہد اللہ نے نئے ڈیجیٹل سسٹم کی کارکردگی اور طریقہ کار سے متعلق تفصیلی بریفنگ دی۔ بعد ازاں آئی جی پی نے برانچ کے مختلف سیکشنز کا دورہ کیا اور فراہم کی جانے والی سہولیات کا جائزہ لیا، جہاں شہریوں کو لائسنس کے اجرا، تجدید اور دیگر خدمات دی جائیں گی۔

اس موقع پر گفتگو کرتے ہوئے ذوالفقار حمید کا کہنا تھا کہ لائسنس کے حصول کے عمل کو آسان، شفاف اور تیز بنانا پولیس کی ترجیحات میں شامل ہے۔ انہوں نے کہا کہ جدید ٹیکنالوجی کے استعمال سے انسانی مداخلت کم ہوگی اور شہریوں کو بہتر سہولت میسر آئے گی۔انہوں نے مزید بتایا کہ اس نئے نظام کے تحت شہریوں کو اب مختلف دفاتر کے چکر نہیں لگانے پڑیں گے، بلکہ ٹیسٹ، فیس جمع کروانے اور تصویر لینے سمیت تمام مراحل ایک ہی جگہ پر مکمل کیے جا سکیں گے، جس سے وقت اور محنت دونوں کی بچت ہوگی۔