کامن ویلتھ گیمز: فاطمہ زہرہ نے ویمن باکسنگ کے سیمی فائنل کیلئے کوالیفائی کرلیا

کامن ویلتھ گیمز میں پاکستان کو پہلی اچھی خبر مل گئی۔ قومی خاتون باکسر فاطمہ زہرہ نے ویمن باکسنگ کے کوارٹر فائنل میں کامیابی حاصل کرکے سیمی فائنل کیلئے کوالیفائی کیا اور پاکستان کیلئے ایونٹ کا پہلا تمغہ یقینی بنا دیا۔

پاکستان کی خاتون باکسر فاطمہ زہرہ نے کامن ویلتھ گیمز کی ویمنز 60 کلوگرام کیٹیگری کے کوارٹر فائنل میں نیوزی لینڈ کی جارڈن ولسن کو یکطرفہ مقابلے کے بعد 0-5 سے شکست دے کر سیمی فائنل کے لیے کوالیفائی کر لیا۔ 

گلاسگو کے ایس ای سی ہال فائیو میں کھیلے گئے مقابلے میں فاطمہ زہرہ نے تینوں راؤنڈز میں عمدہ کارکردگی کا مظاہرہ کیا اور پانچوں ججز نے انہیں فاتح قرار دیا۔

باکسنگ مقابلوں کے فارمیٹ کے مطابق سیمی فائنل میں رسائی کے ساتھ ہی فاطمہ زہرہ نے پاکستان کے لیے کم از کم کانسی کا تمغہ یقینی بنا دیا۔

فاطمہ زہرہ اس سے قبل اسلامک سالیڈیریٹی گیمز میں بھی پاکستان کیلئے برانز میڈل جیت چکی ہیں۔ وہ اب سیمی فائنل میں کامیابی حاصل کر کے فائنل تک رسائی کیلئے پُرامید ہیں۔