امریکا کی جانب سے ایران پر نئی پابندیاں، 8 آئل ٹینکرز اور 10 شخصیات نشانہ

واشنگٹن: ٹرمپ انتظامیہ نے ایران سے متعلق پابندیوں کے ایک نئے مرحلے کا اعلان کردیا۔ 

امریکی وزارتِ خزانہ کی ویب سائٹ پر جاری کردہ نوٹس کے مطابق نئی پابندیاں 8 تیل بردار جہازوں اور 10 مختلف اداروں پر لگائی گئی ہیں۔

یہ پابندیاں ان حالیہ اقدامات کا سلسلہ ہیں جو واشنگٹن کی جانب سے ایران کی تیل کی تجارت اور اس کے ’شیڈو فلیٹ‘ پر لگاتار عائد کیے جا رہے ہیں۔

امریکی محکمہ خزانہ کا موقف ہے کہ ان اقدامات کا مقصد تہران کے اس ریونیو اور آمدنی پر روک لگانا ہے جو، اس کے بقول، ایرانی ہتھیاروں کے پروگرامز اور علاقائی اتحادیوں کی مالی اعانت کے لیے استعمال ہوتا ہے۔

امریکی اقدام ایک ایسے وقت میں سامنے آیا ہے جب مشرقِ وسطیٰ میں جنگ بندی رہنے کے بعد دوبارہ شدید کشیدگی پائی جارہی ہے، جہاں امریکا اور ایران کی جانب سے ایک دوسرے پر حملے کیے جارہے ہیں۔