پولیس نے میر رضا کی موت کا پورا کیس ٹریس کرلیا ہے: آئی جی سندھ جاوید عالم

آئی جی سندھ جاوید عالم نے دعویٰ کرتے ہوئے کہا ہے کہ پولیس نے نوجوان تاجر میر رضا کی موت کا پورا کیس ٹریس کرلیا ہے۔

سٹی کورٹ میں میڈیا سے گفتگو کرتے ہوئے آئی جی سندھ کا کہنا ہے کہ بہت جلد پولیس پریس کانفرنس کرے گی اور کیس سے متعلق سب بتائے گی۔

جاوید عالم نے کہا ہے کہ کیس پر بہت محنت کی ہے، پولیس نے کوئی لاپرواہی نہیں کی۔

ان کا کہنا ہے کہ غیر متعلقہ میڈیکو لیگل افسر کیس پر کمنٹ کر رہا ہے۔ میڈیکل بورڈ بٹھا دیں ہمیں کوئی اعتراض نہیں ہے۔ 

انہوں نے کہا ہے کہ میڈیکل بورڈ کا جو فیصلہ ہوگا اس کے مطابق پولیس کی تفتیش ہو گی۔

دوسری جانب میر رضا کے والد میر حسین نے تفتیش میں کوتاہی کا الزام لگاتے ہوئے کہا ہے کہ ہم قتل کی بات کر رہے ہیں مگر تفتیش کچھ اور ہو رہی ہے۔

میر رضا علی کے والد نے کہا ہے کہ میرے بیٹے پر قرض تھا تو پورے ملک پر بھی قرض ہے، ہم قتل کی بات کر رہے ہیں مگر تفتیش کچھ اور ہو رہی ہے۔

ان کا کہنا ہے کہ پوسٹ مارٹم کرنے والا ڈاکٹر کیوں غائب ہے، پولیس نے ابھی تک ہمارا بیان ریکارڈ نہیں کیا ہے، پولیس ہم سے کچھ اور بات کرتی ہے باہر کچھ اور، میڈیا پر خبر چلنے کے بعد پولیس سے رپورٹ مانگی تو ملی، ہم پہلے ہی تکلیف میں ہیں ہمیں انصاف چاہیے۔