ہماری افواج کسی حملے کا جواب دیے بغیر نہیں رہیں گی، عباس عراقچی

تہران (ویب ڈیسک)  10 جون:

ایرانی وزیر خارجہ عباس عراقچی نے امریکا کی حالیہ فوجی کارروائیوں پر سخت ردعمل کا اظہار کرتے ہوئے خبردار کیا ہے کہ ایران اپنی سلامتی اور خودمختاری کے خلاف کسی بھی حملے یا دھمکی کو ہرگز برداشت نہیں کرے گا۔

سماجی رابطے کی ویب سائٹ "ایکس” پر جاری بیان میں عباس عراقچی نے کہا کہ امریکا میدانِ جنگ میں ناکامیوں کے باوجود ایران کے عزم اور حوصلے کو آزمانے کی کوشش کر رہا ہے، تاہم ایرانی قوم اور مسلح افواج ہر قسم کی جارحیت کا بھرپور جواب دینے کی مکمل صلاحیت رکھتی ہیں۔

انہوں نے امریکا کو مخاطب کرتے ہوئے کہا کہ اگر وہ اپنی سلامتی کا خواہاں ہے تو اسے مشرقِ وسطیٰ کے خطے سے نکل جانا چاہیے۔ ان کا کہنا تھا کہ ایران کی طاقتور افواج کسی بھی حملے، اشتعال انگیزی یا دھمکی کا مؤثر جواب دینے کی بھرپور صلاحیت رکھتی ہیں۔

ایرانی وزیر خارجہ نے مزید کہا کہ خلیج فارس کی تاریخ اس امر کی گواہ ہے کہ بیرونی طاقتوں اور حملہ آور قوتوں کو اس خطے میں ہمیشہ مشکلات اور ناکامیوں کا سامنا کرنا پڑا ہے۔ ان کے بقول تاریخ میں متعدد ایسے واقعات موجود ہیں جن میں بیرونی مداخلت کرنے والی طاقتیں اپنے مقاصد حاصل کرنے میں ناکام رہی ہیں۔

عباس عراقچی کا یہ بیان ایسے وقت میں سامنے آیا ہے جب ایران اور امریکا کے درمیان کشیدگی میں ایک بار پھر اضافہ دیکھنے میں آ رہا ہے۔ حالیہ دنوں میں دونوں ممالک کے درمیان فوجی اور سفارتی سطح پر سخت بیانات کا تبادلہ بھی سامنے آیا ہے، جس سے خطے کی صورتحال مزید حساس ہوتی دکھائی دے رہی ہے۔