مصر نے آسٹریلیا کو پنالٹی شوٹ آؤٹ میں ہرا دیا

فیفا ورلڈ کپ کے اہم میچ میں مصر نے آسٹریلیا کو پنالٹی شوٹ آؤٹ پر شکست دے دی۔

ڈیلاس میں کھیلے گئے میچ میں مصر اور آسٹریلیا نے پہلے ہاف میں ایک دوسرے کے گول پر حملے کئے مگر کامیابی مصر کو ملی جس کے کھلاڑی امام عاشور نے 13ویں منٹ میں ہی گیند حریف ٹیم کے جال میں ڈال دی۔

پہلے ہاف کے اختتام تک مصر کو ایک صفر کی برتری حاصل رہی، دوسرے ہاف کو شروع ہوئے دس منٹ ہی ہوئے تھے کہ ایک موو پر مصر کے کھلاڑی محمد ہانی کی غلطی نے گیند اُن ہی کی ٹیم کے جال میں پہنچادی جس کے سبب مقابلہ ایک، ایک گول سے برابر ہوگیا۔

اس کے بعد کوئی ٹیم بھی مقررہ وقت میں مزید گول نہ کرسکی، اضافی وقت میں بھی دونوں ٹیموں کے کھلاڑیوں کی گول کرنے کی کوشش ناکام گئی۔

پندرہ، پندرہ منٹ کے یہ دونوں ہاف بغیر کسی گول کے برابری پر ختم ہوئے تو میچ کو فیصلہ کن بنانے کیلئے پنالٹی شوٹ آؤٹ کا سہارا لیا گیا۔

اس سیشن میں آسٹریلوی ٹیم کے کھلاڑی ساؤٹار اور ہیرنگٹن پنالٹی مس کر بیٹھے جبکہ مصر نے چار کی چار پنالٹیز پر گول کرکے راؤنڈ آف سکسٹین میں پہلی مرتبہ جگہ بنالی۔