بیرسٹر گوہر اور محسن نقوی کی رواں ماہ 3 سے 4 ملاقاتوں کا انکشاف

اسلام آباد (پی این پی) ملک کے سیاسی اور معاشی حالات کے حوالے سے اہم دعوے سامنے آئے ہیں، جن میں حکومت اور پاکستان تحریک انصاف کی قیادت کے درمیان پس پردہ رابطوں اور ملاقاتوں کا ذکر کیا گیا ہے۔

اینکر پرسن منیب فاروق نے جیو نیوز کے پروگرام میں گفتگو کرتے ہوئے دعویٰ کیا کہ پی ٹی آئی چیئرمین بیرسٹر گوہر کی رواں ماہ وزیر داخلہ محسن نقوی سے 3 سے 4 ملاقاتیں ہوچکی ہیں، جبکہ ان میں سے ایک ملاقات خاصی طویل رہی۔

ان کے مطابق مبینہ طور پر پی ٹی آئی قیادت کو یہ پیغام دیا گیا ہے کہ اگر 27 ستمبر کو احتجاج نہیں کیا جاتا تو عمران خان کو پمز اسپتال کے بجائے کسی دوسرے بہتر اسپتال منتقل کرنے پر غور کیا جاسکتا ہے۔

منیب فاروق نے مزید دعویٰ کیا کہ احتجاج کی صورت حال پرامن رہنے کی صورت میں، یا 27 ستمبر کا احتجاج مؤخر یا منسوخ کیے جانے پر بشریٰ بی بی کو اسی ماہ اہم ریلیف ملنے کا امکان ہے۔ ان کے مطابق اس میں بنی گالہ منتقل کیے جانے یا رہائی کی صورت بھی شامل ہوسکتی ہے۔

اینکر پرسن کا کہنا تھا کہ فیلڈ مارشل عاصم منیر کی بطور چیف آف آرمی اسٹاف تقرری کے بعد سے عمران خان کے معاملے پر اسٹیبلشمنٹ کی جانب سے اب تک کسی قسم کی نرمی یا لچک کا مظاہرہ نہیں کیا گیا۔

انہوں نے مزید کہا کہ عمران خان کو اس عرصے کے دوران کسی ڈیل کی پیشکش بھی نہیں کی گئی۔ تاہم خبر میں بیان کردہ ملاقاتوں اور مبینہ پیشکشوں سے متعلق دعوے منیب فاروق کی گفتگو پر مبنی ہیں۔

بیرسٹر گوہر کی محسن نقوی سے رواں ماہ 3،4 ملاقاتیں ہو چکی ۔ہوسکتا ہے عمران خان پمز کے بجائے کسی اور اسپتال منتقل کردیا جائے ۔بشریٰ بی بی کو بھی اس مہینے میں اچھا بڑا ریلیف مل سکتا ہے اگر 27 ستمبر کو احتجاج نہیں ہوتا ۔منیب فاروق کی خبر https://t.co/ZyaM3dMhBS

— Geo News Urdu (@geonews_urdu) September 11, 2026