امریکا، ڈنمارک اور گرین لینڈ میں اہم سکیورٹی معاہدہ طے

امریکا، ڈنمارک اور گرین لینڈ کے درمیان آرکٹک خطے کی سکیورٹی سے متعلق اہم معاہدہ طے پا گیا ہے، جس کے تحت گرین لینڈ میں امریکی فوجی موجودگی بڑھانے کی راہ ہموار ہوگی۔

نیویارک میں اقوام متحدہ کی جنرل اسمبلی کے اجلاس کے موقع پر امریکی صدر ڈونلڈ ٹرمپ، ڈنمارک کی وزیراعظم میٹے فریڈرکسن اور گرین لینڈ کے وزیراعظم جینز فریڈرک نیلسن نے سہ فریقی معاہدے پر دستخط کیے۔

معاہدے کا مقصد آرکٹک اور شمالی بحر اوقیانوس کے خطے میں مشترکہ دفاع اور سکیورٹی کو مضبوط بنانا ہے۔ معاہدے کے تحت امریکا کو گرین لینڈ میں دفاعی مقاصد کے لیے فوجی رسائی اور موجودگی بڑھانے کی اجازت دی گئی ہے۔

معاہدے میں گرین لینڈ میں امریکی ’گولڈن ڈوم‘ میزائل دفاعی نظام کے قیام کی گنجائش بھی شامل ہے۔ وائٹ ہاؤس کے مطابق یہ نظام شمالی امریکا اور متعلقہ اتحادی علاقوں کے دفاع میں کردار ادا کرے گا۔

یہ پیش رفت صدر ٹرمپ کی جانب سے گرین لینڈ کو امریکا کا حصہ بنانے کے سابق مطالبے کے بعد سامنے آئی ہے۔ نئے معاہدے میں گرین لینڈ کی خودمختاری، علاقائی سالمیت اور عوام کے حق خودارادیت کو تسلیم کیا گیا ہے۔

ڈنمارک کی وزیراعظم میٹے فریڈرکسن نے کہا ہے کہ معاہدہ ڈنمارک، گرین لینڈ اور امریکا کے ساتھ ساتھ نیٹو اور یورپ کی مشترکہ سکیورٹی کو مضبوط بناتا ہے۔

گرین لینڈ کے وزیراعظم جینز فریڈرک نیلسن نے بھی معاہدے کو گرین لینڈ کے عوام کے حق خودارادیت کے اعتراف سے جوڑا ہے۔ معاہدہ نافذ ہونے سے قبل امریکا، ڈنمارک اور گرین لینڈ میں ضروری پارلیمانی مراحل مکمل کیے جائیں گے