ایران کشیدگی کے دوران متحدہ عرب امارات پر سائبر حملوں میں نمایاں اضافہ

ایران کے ساتھ جاری تنازع اور کشیدگی کے ماحول کے دوران متحدہ عرب امارات پر سائبر حملوں کی رفتار میں انتہائی تیزی آ گئی ہے۔ اماراتی حکام کے جاری کردہ اعداد و شمار کے مطابق یو اے ای پر ایک ہی دن میں 6 لاکھ 40 ہزار سائبر حملے ریکارڈ کیے گئے ہیں۔

حکام نے بتایا ہے کہ ان حملوں کے دوران پیٹرولیم، گیس، بجلی، پانی اور بینکنگ سمیت ملک کے تمام انتہائی اہم اور حساس شعبے سائبر حملہ آوروں کے بنیادی نشانے پر رہے۔ اس صورتحال کے پیش نظر اماراتی سائبر سکیورٹی کونسل نے فوری طور پر تمام متعلقہ سرکاری اور نجی کمپنیوں کو ہائی الرٹ رہنے کا مشورہ دیا ہے۔

رپورٹس کے مطابق اس سال اپریل کے مہینے میں بھی سائبر حملوں کی ماہانہ تعداد بڑھ کر 8 لاکھ تک پہنچ گئی تھی۔ اماراتی حکام کا کہنا ہے کہ سائبر حملے اب جدید دور میں جنگ کا ایک نیا اور خطرناک ہتھیار بن چکے ہیں، جبکہ کل حملوں میں سے 85 فیصد سے زائد صارفین کی جانب سے کی جانے والی کسی غلط کلک یا لاپرواہی سے شروع ہوتے ہیں۔

حکام نے مزید انتباہ جاری کیا ہے کہ سائبر حملہ آور کئی ماہ تک مکمل خاموش رہنے کے بعد اچانک تباہ کن کارروائی کرنے کی صلاحیت رکھتے ہیں، لہذا ملک بھر کے تمام اداروں کو مسلسل اور انتہائی چوکس رہنے کی ضرورت ہے۔