نجی بینک سے ڈاکو 50 لاکھ روپے سے زائد لوٹ کر فرار

اسلام آباد(نیوز ڈ یسک) کراچی کے علاقے اورنگی ٹاؤن پیر آباد میں نجی بینک کی برانچ سے ڈاکو لاکھوں روپے لوٹ کر فرار ہوگئے۔

تفصیلا ت کے مطابق کراچی کے علاقے اورنگی ٹاؤن پیر آباد میں ڈاکو نجی بینک کی برانچ سے 50 لاکھ روپے سے زائد لوٹ کر فرار ہوگئے۔ایس ایس پی ویسٹ طارق مستوئی کا کہنا ہے کہ بینک میں 4 سے 5 ڈاکوؤں نے واردات کی ہے، 3 مسلح ملزمان بینک میں داخل ہوئے اور 2 باہر رہے، ملزمان نے گارڈ سے پستول اور رائفل چھیننے کے بعد کاؤنٹر سے کیش لوٹا۔پولیس حکام کے مطابق موٹر سائیکل پر سوار ملزمان بینک کا دروازہ بھی لاک کرکے فرار ہوگئے۔ایس ایس پی کا کہنا ہے کہ ڈاکوؤں نے 50 سے 60 لاکھ کے درمیان رقم لوٹی ہے، واردات کی اطلاع پر پولیس اور کرائم سین یونٹ کی ٹیمیں موقع پر پہنچیں۔

پولیس کا کہنا ہے کہ بینک اور اطراف کی سی سی ٹی وی فوٹیج حاصل کی جارہی ہیں۔واضح رہے کہ سی پی ایل سی حکام کا کہنا تھا کہ مارچ 2026 کے دوران اسٹریٹ کرائمز میں خطرناک حد تک اضافہ ریکارڈ کیا گیا۔

سی پی ایل سی کی رپورٹ کے مطابق مارچ کے دوران مجموعی طور پر 3027 موٹرسائیلیں چوری ہوئیں جبکہ 440 چھینی گئیں، شہری 1265 موبائل فونز سے محروم ہوئے، 140 کاریں چوری ہوئی جبکہ 17 گاڑیاں چھینی گئیں۔