واشنگٹن میں پاکستانی سفارتخانے میں قائداعظم کا مجسمہ نصب

واشنگٹن: امریکا میں پاکستانی سفارتخانے میں بانی پاکستان قائداعظم محمد علی جناح کا مجسمہ نصب کردیا گیا، جس کی باقاعدہ نقاب کشائی یوم آزادی کی تقریب کے دوران کی گئی۔

تقریب میں امریکا میں پاکستان کے سفیر رضوان سعید شیخ، پاکستانی نژاد امریکی شہریوں، سفارت کاروں اور میڈیا نمائندوں سمیت دیگر شخصیات نے شرکت کی۔ سفیر نے تقریب کے دوران قائداعظم کے مجسمے کی نقاب کشائی کی۔

مجسمہ ہیوسٹن میں قائم قائداعظم فاؤنڈیشن کی جانب سے پاکستانی سفارتخانے کو تحفے کے طور پر دیا گیا ہے۔ اسے سفارتخانے میں مستقل طور پر نصب کیا گیا ہے۔

اس موقع پر پاکستانی سفیر نے بانی پاکستان کی سیاسی جدوجہد اور قیام پاکستان کے لیے ان کی خدمات کو خراج عقیدت پیش کیا۔ انہوں نے کہا کہ قائداعظم کی قیادت اور اصول پاکستان کی قومی شناخت کا اہم حصہ ہیں۔

یوم آزادی کی تقریب کا آغاز پاکستانی پرچم کشائی سے ہوا، جبکہ قومی ترانہ اور تلاوت قرآن پاک بھی پیش کی گئی۔ تقریب میں صدر پاکستان، وزیراعظم اور نائب وزیراعظم کے یوم آزادی کے پیغامات بھی پڑھ کر سنائے گئے۔

رضوان سعید شیخ نے پاکستان اور امریکا کے باہمی تعلقات کی اہمیت پر بات کرتے ہوئے کہا کہ دونوں ممالک مختلف شعبوں میں تعاون جاری رکھے ہوئے ہیں۔

تقریب کے دوران پاکستانی نژاد امریکی کمیونٹی سے تعلق رکھنے والے وقار علی خان کو بھی ان کی طویل خدمات کے اعتراف میں صدر کا تمغہ برائے حسن کارکردگی عطا کیا گیا۔

قائداعظم کے مجسمے کی سفارتخانے میں مستقل تنصیب کو پاکستان کی قومی تاریخ اور بانی پاکستان کی خدمات کو اجاگر کرنے کی ایک اہم علامت قرار دیا جارہا ہے۔