غزہ میں اسرائیلی فضائی حملہ، 2 فلسطینی جاں بحق، 13 زخمی

غزہ کی پٹی میں اسرائیلی فضائی حملے کے نتیجے میں گاڑی میں سوار کم از کم دو فلسطینی جاں بحق جبکہ 13 افراد زخمی ہوگئے۔

میڈیا رپورٹس کے مطابق حملہ غزہ شہر کے مغربی علاقے تل الحوا میں کیا گیا، جس کے نتیجے میں گاڑی مکمل طور پر تباہ ہوگئی۔

مقامی طبی ذرائع نے بتایا کہ دھماکے میں جاں بحق ہونے والے افراد کی لاشیں بری طرح متاثر ہوئی ہیں، جس کے باعث ان کی شناخت میں مشکلات پیش آرہی ہیں۔ طبی عملے نے شہریوں سے دونوں افراد کی شناخت میں مدد کے لیے معلومات فراہم کرنے کی اپیل کی ہے۔

دوسری جانب اسرائیلی فوج نے دعویٰ کیا ہے کہ حملے میں حماس کے دو جنگجوؤں کو نشانہ بنایا گیا، تاہم فوج کی جانب سے اس دعوے کے حق میں کوئی شواہد پیش نہیں کیے گئے۔

رپورٹس کے مطابق اکتوبر 2025 میں امریکا کی حمایت سے ہونے والی جنگ بندی کے بعد غزہ میں بڑے پیمانے پر لڑائی میں کمی آئی تھی، تاہم اسرائیلی حملوں کا سلسلہ مکمل طور پر نہیں رکا اور مستقل جنگ بندی کے حوالے سے پیش رفت بھی محدود رہی ہے۔