محکمہ موسمیات نے ہیٹ ویو کا الرٹ جاری کردیا

محکمہ موسمیات نے ملک کے مختلف علاقوں میں شدید گرمی کی لہر کے پیش نظر ہیٹ ویو الرٹ جاری کر دیا ہے۔ ادارے کے مطابق جنوبی پنجاب، سندھ اور بلوچستان اس موسم سے زیادہ متاثر ہونے کا امکان ہے، جہاں درجہ حرارت معمول سے 4 سے 6 ڈگری سینٹی گریڈ زیادہ رہ سکتا ہے۔
محکمہ موسمیات نے پیشگوئی کی ہے کہ اپریل کے آخری دنوں اور مئی کے ابتدائی ایام میں شدید گرمی کی یہ صورتحال برقرار رہے گی۔
کراچی اور دیگر ساحلی علاقوں میں بھی موسم زیادہ گرم ہونے کا امکان ظاہر کیا گیا ہے۔ شہریوں کو ہدایت کی گئی ہے کہ غیر ضروری طور پر گھروں سے باہر نہ نکلیں، دھوپ سے بچیں اور احتیاطی تدابیر اختیار کریں۔
ماہرین نے خبردار کیا ہے کہ ہیٹ ویو کے دوران بچوں، بزرگوں اور بیمار افراد کو خصوصی احتیاط کی ضرورت ہے۔ ان کا کہنا ہے کہ زیادہ پانی پینا اور جسم کو ہائیڈریٹ رکھنا ہیٹ اسٹروک سے بچاؤ میں مددگار ثابت ہوگا۔
مزید بتایا گیا ہے کہ مغربی ہواؤں کے اثرات کے باعث بعض علاقوں میں گرد آلود ہوائیں بھی چل سکتی ہیں، جبکہ گرمی کی موجودہ شدت مئی کے پہلے ہفتے تک جاری رہنے کا امکان ہے۔
ہنگامی صورتحال سے نمٹنے کے لیے تمام ریسکیو اداروں کو الرٹ کر دیا گیا ہے، جبکہ وفاقی اور صوبائی حکومتوں نے متعلقہ محکموں کو پیشگی حفاظتی اقدامات یقینی بنانے کی ہدایت کی ہے۔