داماد کے ہاتھوں ساس ، سسر اور بیوی ہلاک

جیکب آباد (پی این پی) ڈیرہ مراد جمالی میں داماد کے ہاتھوں ساس ، سسر اور بیوی قتل، لاشیں جیکب آباد منتقل۔

تفصیلات کے مطابق بلوچستان کے شہر ڈیرہ مراد جمالی کے محلہ غربی اقبال ٹاؤن میں ملزم نے فائرنگ کرکے جیکب آباد سے تعلق رکھنے والے تین افراد قتل کردیا، پولیس کے مطابق ملزم اسرار ہجوانی جمالی نے مبینہ طور پر اپنی بیوی دعا فاطمہ، سسر یاسین بروہی اور ساس مدیحہ کو فائرنگ کرکے قتل کردیا اور موقع سے فرار ہوگیا، واقعے کے بعد مقتولین کی لاشیں ضروری کارروائی کے لیے ڈیرہ مراد جمالی اسپتال منتقل کی گئیں جہاں پوسٹ مارٹم اور دیگر کارروائی مکمل ہونے کے بعد لاشوں کو جیکب آباد روانہ کردیا گیا، لاشیں جیکب آباد پہنچنے پر علاقے میں کہرام مچ گیا اور فضا سوگوار ہوگئی، مقتولین کے ورثاء مزمل حسین نے بتایا کہ ان کی بہن دعا فاطمہ کی شادی اسرار ہجوانی جمالی سے کی گئی تھی ان کے بقول والد یاسین بروہی اور والدہ مدیحہ اپنی بیٹی سے ملاقات کے لیے ڈیرہ مراد جمالی گئے ہوئے تھے کہ اس دوران ملزم نے فائرنگ کرکے تینوں کو قتل کردیا،

انہوں نے وزیر اعلیٰ بلوچستان اور آئی جی بلوچستان سے مطالبہ کیا کہ واقعے میں ملوث ملزم کو فوری گرفتار کرکے سخت سزا دی جائے، ڈیرہ مراد جمالی پولیس کے مطابق ابتدائی طور پر واقعہ گھریلو ناچاقی کا نتیجہ معلوم ہوتا ہے تاہم واقعے کے تمام پہلوؤں سے تحقیقات جاری ہیں پولیس کا کہنا ہے کہ فرار ملزم کی گرفتاری کے لیے مختلف مقامات پر چھاپے مارے جا رہے ہیں اور جلد اسے قانون کی گرفت میں لایا جائے گا۔