کیف پر روسی فضائی حملہ، متعدد ہلاکتیں اور زخمی

روس نے یوکرین کے دارالحکومت کیف پر رات کے دوران ڈرونز اور میزائلوں سے بڑے پیمانے پر فضائی حملہ کیا، جس کے نتیجے میں کم از کم 8 افراد جان کی بازی ہار گئے جبکہ 34 افراد زخمی ہوئے۔

یوکرینی حکام کے مطابق حملوں میں شہر کے مختلف رہائشی علاقوں کو نقصان پہنچا۔ کیف کی فوجی انتظامیہ کا کہنا ہے کہ شہر میں کئی مقامات متاثر ہوئے، جبکہ ایک رہائشی عمارت کا بڑا حصہ میزائل حملے کے باعث منہدم ہوگیا۔ امدادی ٹیمیں ملبے تلے دبے افراد کی تلاش میں مصروف ہیں۔

کیف کے میئر کے مطابق زخمیوں میں ایمبولینس سروس سے وابستہ طبی عملہ اور ڈرائیور بھی شامل ہیں۔ حملوں کے بعد شہر کے مختلف علاقوں میں آگ لگنے، عمارتوں کے شیشے ٹوٹنے اور گاڑیوں کو نقصان پہنچنے کی اطلاعات بھی سامنے آئیں۔

فضائی خطرے کے سائرن بجنے پر بڑی تعداد میں شہری زیرِ زمین میٹرو اسٹیشنوں اور دیگر محفوظ مقامات پر منتقل ہوگئے۔ عینی شاہدین کے مطابق حملوں کے دوران شہر میں متعدد دھماکوں کی آوازیں سنی گئیں۔

یوکرین کے صدر وولودی میر زیلنسکی نے سیکیورٹی صورتحال کے پیش نظر اپنا غیر ملکی دورہ مختصر کر دیا۔ دوسری جانب یوکرین کی امریکا میں سفیر نے حملے کو شہریوں کے لیے ایک اور مشکل رات قرار دیتے ہوئے کہا کہ لوگوں نے پوری رات پناہ گاہوں میں گزاری۔

ادھر پولینڈ اور فن لینڈ نے احتیاطی اقدامات کے طور پر اپنی فضائی نگرانی میں اضافہ کیا۔ پولینڈ نے مختصر وقت کے لیے جنگی طیارے بھی روانہ کیے، تاہم بعد میں واضح کیا کہ اس کی فضائی حدود کی خلاف ورزی نہیں ہوئی۔

دوسری جانب روس کے لینن گراڈ ریجن کے گورنر نے دعویٰ کیا کہ روسی فضائی دفاع نے سات یوکرینی ڈرونز تباہ کر دیے، جبکہ روس کے سرحدی علاقے بیلگورود میں یوکرینی ڈرون حملے کے نتیجے میں ایک شخص ہلاک اور ایک خاتون زخمی ہونے کی اطلاع دی گئی۔

نوٹ: اس خبر میں شامل روس اور یوکرین کے دعووں کی آزاد ذرائع سے مکمل تصدیق نہیں ہو سکی۔