امریکا میں مسلمان ہونے کی وجہ سے شہری پر جان لیوا حملہ

امریکا کی ریاست یوٹا میں ایک مسلمان شہری پر مبینہ مذہبی نفرت کی بنیاد پر چاقو سے حملے کا واقعہ پیش آیا، جس میں متاثرہ شخص شدید زخمی ہو گیا۔ پولیس نے ملزم کو موقع پر گرفتار کر کے اس کے خلاف مختلف دفعات کے تحت مقدمہ درج کر لیا ہے۔

پولیس کے مطابق واقعہ ویسٹ ویلی سٹی کے ایک شاپنگ مال میں پیش آیا، جہاں متاثرہ شخص ایک کیوسک پر کام کر رہا تھا۔ ابتدائی اطلاعات کے مطابق ملزم پہلے اس کے پاس گیا، اس کا نام اور مذہب دریافت کیا اور پھر اچانک چاقو سے حملہ کر دیا۔

حکام کا کہنا ہے کہ حملے میں متاثرہ شخص کو جسم پر متعدد گہرے زخم آئے اور اسے تشویشناک حالت میں اسپتال منتقل کیا گیا، جہاں اس کا علاج جاری ہے۔

عینی شاہدین نے فوری ردعمل دیتے ہوئے حملہ آور کو قابو میں رکھا، جس کے بعد پولیس نے موقع پر پہنچ کر اسے حراست میں لے لیا۔

عدالتی دستاویزات کے مطابق دورانِ تفتیش ملزم نے مبینہ طور پر اعتراف کیا کہ اس نے متاثرہ شخص کو اس کے مسلمان ہونے کی وجہ سے نشانہ بنایا۔ پولیس کا کہنا ہے کہ ملزم کے خلاف اقدامِ قتل اور خطرناک ہتھیار کے استعمال سمیت دیگر الزامات کے تحت کارروائی جاری ہے۔

واقعے کے بعد امریکا کی مختلف مسلم تنظیموں نے حملے کی شدید مذمت کرتے ہوئے اسے مذہبی نفرت پر مبنی جرم قرار دیا ہے اور مطالبہ کیا ہے کہ واقعے کی مکمل تحقیقات کر کے ذمہ دار کو قانون کے مطابق سزا دی جائے۔

انسانی حقوق کے کارکنوں کا کہنا ہے کہ حالیہ برسوں میں امریکا میں مذہبی تعصب اور نفرت پر مبنی جرائم کے واقعات پر تشویش کا اظہار کیا جا رہا ہے، جس کے باعث مختلف برادریوں کے تحفظ کے لیے مؤثر اقدامات کی ضرورت پر زور دیا جا رہا ہے۔