ایرانی حملوں کے زخمیوں کی عیادت،کویتی وزیراعظم کا العدان اسپتال کا دورہ

کویت سٹی: کویت کے وزیراعظم شیخ احمد عبداللہ الاحمد الصباح نے ایرانی حملوں میں زخمی ہونے والے شہریوں کی عیادت کے لیے العدان اسپتال کا دورہ کیا اور متاثرہ افراد کو ہر ممکن طبی سہولیات فراہم کرنے کے حکومتی عزم کا اعادہ کیا۔

کویتی سرکاری میڈیا کے مطابق وزیراعظم کے ہمراہ وزیر صحت ڈاکٹر احمد العوضی بھی موجود تھے۔ دونوں رہنماؤں نے اسپتال میں زیر علاج زخمیوں کی خیریت دریافت کی، ان کی جلد صحت یابی کے لیے نیک خواہشات کا اظہار کیا اور طبی عملے کی خدمات کو سراہا۔

اس موقع پر وزیراعظم نے متعلقہ حکام کو ہدایت کی کہ زخمیوں کے علاج، ادویات، طبی آلات اور دیگر ضروری سہولیات کی فراہمی میں کسی قسم کی غفلت نہ برتی جائے، تاکہ متاثرہ افراد کو بروقت اور بہترین طبی امداد میسر آ سکے۔

شیخ احمد عبداللہ الاحمد الصباح نے کہا کہ حکومت زخمیوں اور ان کے اہل خانہ کے ساتھ کھڑی ہے اور ان کی مکمل صحت یابی تک ہر ممکن تعاون جاری رکھا جائے گا۔

سرکاری ذرائع کے مطابق حالیہ حملوں میں متعدد شہری زخمی ہوئے تھے، جنہیں مختلف اسپتالوں میں منتقل کیا گیا جہاں ان کا علاج جاری ہے۔

یہ پیش رفت ایسے وقت میں سامنے آئی ہے جب ایران اور امریکا کے درمیان بڑھتی ہوئی کشیدگی کے باعث خلیجی خطے میں سکیورٹی صورتحال حساس ہے اور کئی ممالک نے احتیاطی و دفاعی اقدامات مزید سخت کر دیے ہیں۔

کویتی حکام نے عوام کو یقین دلایا ہے کہ متاثرین کے علاج، امدادی سرگرمیوں اور ضروری عوامی خدمات کی فراہمی کے لیے تمام متعلقہ ادارے مکمل طور پر متحرک ہیں۔