آزاد کشمیر کے پہلے مرحلے کے انتخابات: مسلم لیگ (ن) نے 13 میں سے 9 نشستیں جیت لیں

میرپور: آزاد جموں و کشمیر قانون ساز اسمبلی کے انتخابات کے پہلے مرحلے میں میرپور ڈویژن کے تین اضلاع میرپور، بھمبر اور کوٹلی کے 13 حلقوں کے غیر سرکاری و غیر حتمی نتائج کے مطابق مسلم لیگ (ن) نے 9 جبکہ پاکستان پیپلز پارٹی نے 4 نشستوں پر کامیابی حاصل کرلی۔

پولنگ پیر کے روز صبح 8 بجے شروع ہوئی اور شام 5 بجے تک جاری رہنی تھی، تاہم چیف الیکشن کمشنر نے ووٹرز کی سہولت کے پیش نظر پولنگ کا وقت ایک گھنٹہ بڑھا کر شام 6 بجے تک کردیا۔ پولنگ کے بعد ووٹوں کی گنتی مکمل ہونے پر غیر سرکاری نتائج سامنے آئے۔

غیر سرکاری نتائج کے مطابق ایل اے 1، ایل اے 4، ایل اے 5، ایل اے 7، ایل اے 9، ایل اے 11، ایل اے 12 اور ایل اے 13 پر مسلم لیگ (ن) کے امیدوار کامیاب قرار پائے، جبکہ ایل اے 2، ایل اے 3، ایل اے 8 اور ایل اے 10 میں پاکستان پیپلز پارٹی نے کامیابی حاصل کی۔ ایل اے 6 بھمبر 2 میں غیر مکمل نتائج کے مطابق مسلم لیگ (ن) کے امیدوار کو برتری حاصل ہے۔

پہلے مرحلے کے نتائج کے بعد مسلم لیگ (ن) کو واضح برتری حاصل ہوگئی ہے، جبکہ پیپلز پارٹی نے بھی میرپور اور کوٹلی کے چند اہم حلقوں میں کامیابی حاصل کی ہے۔

دوسری جانب پنجاب کی سینئر وزیر اور مسلم لیگ (ن) کی رہنما مریم اورنگزیب نے سوشل میڈیا پلیٹ فارم ایکس پر اپنے ردعمل میں کہا کہ میرپور اور مظفرآباد کے عوام نے مسلم لیگ (ن) پر اعتماد کا اظہار کیا ہے اور 2 اگست کو بھی عوام شیر پر مہر لگا کر اپنے فیصلے کی توثیق کریں گے۔

ابتدائی اطلاعات کے مطابق پہلے مرحلے کے انتخابات میں ووٹنگ کی شرح گزشتہ انتخابات کے مقابلے میں نسبتاً کم رہی، تاہم حتمی ٹرن آؤٹ اور سرکاری نتائج الیکشن کمیشن کی جانب سے جاری کیے جائیں گے۔