سری لنکا ویمنز نے تیسرے ون ڈے میں پاکستان ویمنز کو ہرا کر سیریز 1-2 سے جیت لی

سری لنکا ویمنز نے تیسرے اور فیصلہ کن ون ڈے انٹرنیشنل میں پاکستان ویمنز کو 8 وکٹوں سے ہرا کر سیریز دو ایک سے جیت لی۔

ہمبنٹوٹا میں کھیلے گئے تیسرے ون ڈے میں پاکستان نے پہلے بیٹنگ کی جہاں 10 کے اسکور پر تین کھلاڑی پویلین لوٹ گئیں۔ صدف شمس 9 سدرا امین اور عائشہ ظفر صفر پر آؤٹ ہوئیں۔

تاہم گل فیروزہ اور منیبہ علی نے 68 رنز کی پارٹنرشپ لگائی۔ گل فیروزہ نے 40 اور منیبہ علی نے 34 رنز بنائے۔ 

اس کے بعد کپتان فاطمہ ثنا نے 4 چوکوں اور ایک چھکے کی مدد سے41 رنز کی اننگز کھیلی، لیکن پاکستان ٹیم 40 اوورز میں 187رنز بنا کر آؤٹ ہوگئی۔

سری لنکن کپتان چماری اتاپتو، چیتھانا اور کویشا دلہاری نے تین تین وکٹیں حاصل کیں۔

جواب میں سری لنکن ویمنز ٹیم نے 188 رن کا ہدف 38ویں اوور میں صرف 2 وکٹ پر حاصل کر لیا۔ ہرشیتھا 71 اور ہسنی پریرا 50 رنز بنا کر ناٹ آوٹ رہیں جبکہ چماری اتاپتو نے 52 رنز بنائے۔

سری لنکا نے تین میچز کی سیریز دو ایک سے جیت لی۔ اب دونوں ٹیموں کے درمیان تین ٹی ٹوئنٹی میچز کی سیریز جمعے سے شروع ہوگی۔