ایران کے خلاف ہر ممکن کارروائی کے لیے تیار ہیں، امریکی وزیر دفاع

امریکا کے وزیر دفاع پیٹ ہیگسیتھ نے کہا ہے کہ امریکی فوج کسی بھی ممکنہ صورتحال سے نمٹنے اور ضروری کارروائی کے لیے مکمل طور پر تیار ہے۔ ان کا کہنا ہے کہ دفاعی ادارے ہر وقت ہائی الرٹ ہیں اور قومی سلامتی کے تقاضوں کے مطابق تمام تیاریاں مکمل رکھی گئی ہیں۔

غیر ملکی میڈیا رپورٹس کے مطابق امریکی وزیر دفاع نے سوشل میڈیا پلیٹ فارم ایکس پر جاری اپنے بیان میں صدر ڈونلڈ ٹرمپ کے مؤقف کی حمایت کرتے ہوئے کہا کہ امریکی افواج ہر قسم کی فوجی کارروائی انجام دینے کی صلاحیت رکھتی ہیں۔

پیٹ ہیگسیتھ نے کہا کہ پینٹاگون کسی بھی ہنگامی صورتحال کا مؤثر انداز میں مقابلہ کرنے کے لیے تیار ہے اور امریکی فوج کو مکمل جنگی تیاری کی حالت میں رکھا گیا ہے۔

یہ بیان ایسے وقت میں سامنے آیا ہے جب امریکا اور ایران کے درمیان کشیدگی برقرار ہے اور دونوں ممالک کی جانب سے سخت بیانات کا تبادلہ جاری ہے۔

اس سے قبل امریکی صدر ڈونلڈ ٹرمپ بھی کہہ چکے ہیں کہ ضرورت پڑنے پر امریکا ایران کے خلاف انتہائی بڑے پیمانے پر فوجی کارروائی کی صلاحیت رکھتا ہے۔

دفاعی امور کے ماہرین کا کہنا ہے کہ دونوں ممالک کی جانب سے سخت بیانات خطے میں کشیدگی کو مزید بڑھا سکتے ہیں، جبکہ عالمی برادری مسلسل سفارتی مذاکرات، تحمل اور تنازع کے پرامن حل پر زور دے رہی ہے۔

تجزیہ کاروں کے مطابق امریکا اور ایران کے درمیان موجودہ صورتحال نہ صرف مشرق وسطیٰ بلکہ عالمی سلامتی، توانائی کی منڈیوں اور بین الاقوامی سیاسی منظرنامے پر بھی اثر انداز ہو سکتی ہے۔