ایران پر دباؤ بڑھانے کے لیے امریکی فوج نے نئی تجاویز طلب کرلیں:رپورٹ

واشنگٹن: امریکی میڈیا کی ایک رپورٹ میں دعویٰ کیا گیا ہے کہ امریکی فوج نے ایران پر دباؤ بڑھانے کے لیے اپنے اہلکاروں اور انٹیلی جنس تجزیہ کاروں سے نئی اور غیر روایتی تجاویز طلب کی ہیں۔

رپورٹ کے مطابق امریکی سینٹرل کمانڈ کے انٹیلی جنس شعبے سے وابستہ ایک افسر نے فوجی تجزیہ کاروں کو پیغام بھیج کر ایران کے خلاف دباؤ بڑھانے اور اسے نقصان پہنچانے کے لیے تخلیقی حکمت عملیوں پر غور کرنے کی ہدایت کی۔

امریکی میڈیا کے مطابق پیغام میں کہا گیا کہ ایسے نئے طریقوں پر غور کیا جائے جو روایتی فوجی حکمت عملی سے مختلف ہوں اور ایران کے خلاف مؤثر دباؤ پیدا کر سکیں۔

رپورٹ میں ذرائع کے حوالے سے بتایا گیا ہے کہ ایک سینئر امریکی فوجی افسر نے گزشتہ ہفتے بھی اسی نوعیت کا پیغام جاری کیا تھا، جس میں ایران سے متعلق نئے خیالات اور تجاویز طلب کی گئی تھیں۔

Exclusive: The request from a senior officer at the US military command carrying out President Donald Trump’s war with Iran came in an email: We need ideas.

“We are looking for new creative and unconventional ways to pressure and punish Iran,” an officer in US Central Command’s… pic.twitter.com/cLUJIYWQ5T

— CNN (@CNN) August 3, 2026

تاہم رپورٹ میں یہ واضح نہیں کیا گیا کہ ان تجاویز میں کس قسم کے اقدامات شامل ہو سکتے ہیں یا آیا ان میں فوجی، معاشی، سائبر یا دیگر ذرائع کو شامل کیا جا رہا ہے۔

یہ پیش رفت ایسے وقت میں سامنے آئی ہے جب امریکا اور ایران کے درمیان کشیدگی برقرار ہے اور مشرق وسطیٰ میں صورتحال مسلسل حساس بنی ہوئی ہے۔

امریکی محکمہ دفاع یا سینٹرل کمانڈ کی جانب سے اس رپورٹ پر تاحال کوئی باضابطہ ردعمل سامنے نہیں آیا، جبکہ رپورٹ میں کیے گئے دعوؤں کی آزادانہ تصدیق بھی نہیں ہو سکی۔

دفاعی ماہرین کے مطابق اگر ایسی تجاویز پر عملی اقدامات کیے گئے تو اس کے اثرات امریکا، ایران تعلقات کے ساتھ ساتھ پورے خطے کی سکیورٹی صورتحال پر بھی پڑ سکتے ہیں۔