میر رضا کی موت سے متعلق ابتدائی اندازے مشکوک ہوگئے

کراچی کے نوجوان میر رضا کی موت سے متعلق ابتدائی اندازے مشکوک ہوگئے، جیو نیوز کو موصول ابتدائی میڈیکل رپورٹ میں گولی پیچھے سے لگنے کا انکشاف ہوا ہے، پسلیاں ٹوٹی ہوئی ہیں جبکہ جسم پر تشدد کے نشانات بھی پائے گئے ہیں۔

میڈیکل بورڈ نے قبر کشائی کے بعد پوسٹ مارٹم مکمل کرلیا، جسم کے مختلف نمونے حاصل کرنے کے بعد میر رضا کی دوبارہ تدفین کردی گئی۔

والد میر حسین میڈیکل بورڈ کی کارروائی سے مطمئن ہیں، ان کے وکیل جبران ناصر نے کہا کہ پولیس جو کام 8، 9 روز میں نہ کرسکی، وہ عدالت کی وجہ سے مکمل ہوا، یہ قتل ہے یا خود کُشی؟ اب سب سامنے آجائے گا۔

 آج صبح 11 بجے سوسائٹی قبرستان میں میر رضا کی قبر کشائی کی گئی۔ کارروائی جوڈیشل مجسٹریٹ کی نگرانی میں 8 رکنی میڈیکل بورڈ کی موجودگی میں کی گئی۔  پوسٹ مارٹم کے دوران میر رضا کی لاش کے مختلف نمونے حاصل کرنے کے بعد فارنزک کیلئے بھجوائے گئے۔ میر رضا کے والد نے میڈیکل بورڈ کی کارروائی پر اطمینان کا اظہار کیا ہے۔

قبر کشائی اور لاش سے نمونے حاصل کرنے کا عمل لگ بھگ 4 گھنٹے جاری رہا جس کے بعد میر رضا کی دوبارہ تدفین کردی گئی۔ 

اس موقع پر مرحوم کی والدہ اور ہمشیرہ بھی موجود تھیں۔