سعودی عرب میں میزائل اور ڈرون روکنے کی ویڈیوز بنانے پر پابندی

سعودی وزارت داخلہ نے شہریوں اور ملک میں مقیم غیر ملکیوں کو خبردار کیا ہے کہ فضائی دفاعی نظام کی جانب سے میزائل یا ڈرونز کو روکنے کے مناظر کی ویڈیوز اور تصاویر بنانا یا انہیں سوشل میڈیا پر شیئر کرنا ممنوع ہے۔

وزارت داخلہ کے مطابق کسی بھی فوجی یا دفاعی کارروائی کی عکس بندی، تصاویر بنانے یا ایسے مناظر کو مختلف ڈیجیٹل پلیٹ فارمز پر نشر کرنے کو قومی سلامتی کے لیے خطرہ سمجھا جائے گا۔

سعودی حکام نے واضح کیا ہے کہ قومی سلامتی سے متعلق معاملات میں کسی قسم کی غفلت برداشت نہیں کی جائے گی۔ پابندی کی خلاف ورزی کرنے والے افراد کے خلاف قانون کے مطابق سخت کارروائی کی جائے گی۔

حکام کے مطابق یہ پابندی سعودی شہریوں کے علاوہ ملک میں مقیم غیر ملکی افراد پر بھی یکساں طور پر لاگو ہوگی۔ دفاعی تنصیبات، میزائلوں، ڈرونز یا انہیں روکنے والے دفاعی نظام سے متعلق حساس مناظر کو ریکارڈ کرکے عام کرنے والوں کو قانونی کارروائی کا سامنا کرنا پڑ سکتا ہے۔

سعودی وزارت داخلہ نے عوام سے اپیل کی ہے کہ وہ قومی سلامتی سے متعلق حساس معلومات یا مناظر کی تشہیر سے گریز کریں اور متعلقہ قوانین کی پابندی کریں۔