ہمایوں سعید نے پاکستانی ڈراموں سے متعلق حکومت سے اہم مطالبہ کر دیا

کراچی ( پی این پی ) معروف اداکار  اور پروڈیوسر ہمایوں سعید نے پاکستانی ڈراموں سے متعلق  حکومت سے اہم  مطالبہ  کر دیا ۔

تفصیلات کے مطابق ہمایوں سعید نے حکومت سے مطالبہ کیا ہے کہ پاکستانی ڈراموں اور فلموں کو عالمی سطح پر متعارف کروانے کے لیے مقامی سٹریمنگ پلیٹ فارم کے قیام کی حمایت کرے۔

’’جنگ ‘‘ کے مطابق ہمایوں سعید نے حال ہی میں اپنے ایک انٹرویو کے دوران پاکستانی ڈراموں کے معیار کی تعریف کرتے ہوئے کہا کہ پاکستانی ڈراموں کی اپنی منفرد شناخت ہے، جس کی بنیاد ان کی کہانیوں، مکالموں اور اردو زبان کے مخصوص انداز پر ہے۔پاکستانی ڈرامے بین الاقوامی سٹریمنگ پلیٹ فارمز، خصوصاً نیٹ فلکس پر جگہ بنانے کی صلاحیت رکھتے ہیں۔ پاکستان کو صرف غیر ملکی پلیٹ فارمز پر انحصار کرنے کے بجائے اپنا او ٹی ٹی پلیٹ فارم قائم کرنا چاہیے، جہاں مقامی فلم سازوں، اداکاروں اور پروڈیوسرز کو اپنی صلاحیتیں دکھانے کے زیادہ مواقع میسر آ سکیں۔

انہوں نے بھارت کی مثال دیتے ہوئے کہا کہ وہاں بھی مقامی سٹریمنگ پلیٹ فارمز نے پہلے جگہ بنائی، جس کے بعد عالمی پلیٹ فارمز کی توجہ حاصل ہوئی۔ پاکستان میں بھی ایسا پلیٹ فارم قائم ہونے سے نئی کہانیوں اور معیاری ڈیجیٹل پروڈکشنز کی تیاری کو فروغ مل سکتا ہے۔

انہوں نے شوبز انڈسٹری میں نئے اداکاروں کو متعارف کروانے میں سوشل میڈیا کے کردار پر بھی بات کی۔ 

اداکار کا کہنا ہے کہ ٹک ٹاک اور دیگر ڈیجیٹل پلیٹ فارمز نے نئے ٹیلنٹ کو اپنی صلاحیتیں دکھانے کے مواقع فراہم کیے ہیں، تاہم سوشل میڈیا پر مقبولیت کسی اداکار کی حقیقی اداکاری کی صلاحیت کا مکمل معیار نہیں۔

انہوں نے اداکارہ ہانیہ عامر کی مثال دیتے ہوئے بتایا کہ ہانیہ کو ڈب اسمیش پر دیکھا تھا، جس کے بعد انہیں ڈرامے میں کام کرنے کا موقع دیا گیا۔