عالمی برادری جنوبی سوڈان کی سیاسی منتقلی میں اس کی خودمختاری اور قیادت کا احترام کرے،چین کا مطالبہ
اقوام متحدہ میں چین کے نائب مستقل نمائندے ڈائی بنگ نے سلامتی کونسل میں جنوبی سوڈان کے مسئلے کا جائزہ لینے کے موقع پر ، اس بات پر زور دیا کہ عالمی برادری کو سیاسی منتقلی میں جنوبی سوڈان کی خود مختاری اور قیادت کا مؤثر طریقے سے احترام کرنا چاہیے ، اور دباؤ ، مداخلت یا بیرونی معیارات کے نفاذ سے گریز کرنا چاہیے۔
ڈائی بنگ نے کہا کہ اس وقت جنوبی سوڈان بحالی کے معاہدے پر عمل درآمد اور سیاسی منتقلی کو فروغ دینے کے کلیدی دور میں ہے اور عالمی برادری کو جنوبی سوڈان کی پرامن ترقی کے لیے تعمیری تعاون فراہم کرنا چاہیے۔ جنوبی سوڈان کے عوام کو اپنے قومی حالات کے مطابق اپنے ملک کی تقدیر کا تعین کرنے کا حق ہے۔
ڈائی بنگ نے کہا کہ چین جنوبی سوڈان کی حکومت کی حمایت کرتا ہے کہ وہ متعلقہ قبائل اور نسلی گروہوں کے ساتھ بات چیت کرے تاکہ زمین، چراگاہوں اور مویشیوں کی نقل مکانی جیسے متنازعہ مسائل میں حل پیدا ہو اور جلد از جلد امن اور مفاہمت کو حاصل کیا جا سکے۔
ڈائی بنگ نے کہا کہ جنوبی سوڈان کو وجود میں آئے زیادہ عرصہ نہیں ہوا اور اس کی اقتصادی بنیاد کمزور ہے۔ عالمی بینک اور اقوام متحدہ کے ترقیاتی پروگرام جیسے ترقیاتی شراکت داروں کے ساتھ ساتھ دیگر اداروں کو بھی جنوبی سوڈان کی اقتصادی ترقی کے حوالے سے زیادہ مدد فراہم کرنی چاہیے ۔ جنوبی سوڈان میں اقوام متحدہ کے مشن میں اہم فوجی تعاون کرنے والے ملک کے طور پر، چین جنوبی سوڈان میں اقوام متحدہ کے مشن کے کام کی مضبوط حمایت اور جنوبی سوڈان کے امن اور خوشحالی میں اپنا کردار ادا کرتا رہے گا۔