چوہدری شجاعت کی قیادت میں پاکستان کو اقبال کے خواب کے مطابق بنائیں گے۔ ڈاکٹر امجد

اسلام آباد: پاکستان مسلم لیگ کے چیف آرگنائزر ڈاکٹر محمد امجد نے کہا ہے کہ چوہدری شجاعت حسین کی قیادت میں پاکستان کو علامہ اقبال کے خواب کے عین مطابق بنائیں گے۔
ان خیالات کا اظہار انہوں نے ہفتہ کو مسلم لیگ ہاؤس میں یوم اقبال کی مناسبت سے منعقدہ ایک پروقار تقریب سے خطاب کرتے ہوئے کیا۔
انہوں نے کہا کہ بدقسمتی سے ہم ابھی اس منزل سے دور ہیں جس کا خواب مصور پاکستان علامہ محمد اقبال نے دیکھا تھا۔ ہمیں اس خواب کی تعبیر کے حصول کے لئے مل جل کر شب و روز محنت کرنا ہوگی۔ انہوں نے کہا کہ ہم پاکستان مسلم لیگ کے سربراہ چوہدری شجاعت حسین کی قیادت میں اپنے ملک کو حقیقی طور پر علامہ محمد اقبال کے تصور کے عین مطابق بنائیں گے۔ انہوں نے پوری قوم کو یوم اقبال پر مبارکباد بھی پیش کی۔ تقریب میں یوم اقبال کی مناسبت سے کیک بھی کاٹا گیا۔ اس موقع پر رکن قومی اسمبلی مسز فرخ خان، کنور دلشاد، غلام مصطفیٰ ملک، مہرین ملک آدم، جہانزیب امجد، شاہزیب امجد، چوہدری جہانگیر اور دیگر پارٹی رہنما بھی موجود تھے۔