کشمیر اور پاکستان کے ماحولیاتی مسائل پر بات چیت کرنا وقت کی اہم ضرورت ہے۔ڈاکٹر شوکت علی شیخ

برمنگھم : پاکستان اور کشمیر کو درپیش ماحولیاتی مسائل اور ان کے ممکنہ حل کے حوالے سے برمنگھم میں ایک اہم اور مفید نشست منعقد ہوئی جس میں مختلف شعبہ ہائے زندگی سے تعلق رکھنے والی نمایاں شخصیات نے شرکت کی۔نشست کے دوران ماحولیاتی چیلنجز، موسمیاتی تبدیلی کے اثرات اور خطے میں ماحول کے تحفظ کے لیے مشترکہ اقدامات پر تفصیلی گفتگو کی گئی۔اس موقع پر برطانیہ میں مقیم بین الاقوامی شہرت یافتہ ماحولیاتی سائنس دان ڈاکٹر سردار صبور، مسلم لیگ آزاد کشمیر کے صدر محمد شفیق اور برطانیہ میں مقیم معروف کشمیری شخصیت عامر شریف بھی موجود تھے۔
اجلاس میں مسلم لیگ (ق) اوورسیز یوکے کے سینئر رہنما ڈاکٹر شوکت علی شیخ نے بھی شرکت کی اور ماحولیاتی تحفظ کے لیے آگاہی بڑھانے اور عملی اقدامات کی ضرورت پر زور دیا۔
شرکاء نے اس بات پر اتفاق کیا کہ پاکستان اور کشمیر میں ماحولیاتی مسائل سے نمٹنے کے لیے عالمی سطح پر تعاون اور مؤثر پالیسی سازی ناگزیر ہے۔