ایران کے 4 جنوبی صوبوں میں حتمی امتحانات ملتوی

تہران: ایران کی وزارتِ تعلیم نے ملک کی موجودہ صورتحال کے پیشِ نظر جنوبی صوبوں میں بارہویں اور گیارہویں جماعت کے بعض حتمی امتحانات ملتوی کرنے کا اعلان کر دیا ہے۔

وزارتِ تعلیم کے سپریم امتحانی ہیڈکوارٹر کے مطابق ہرمزگان، بوشہر، خوزستان اور سیستان و بلوچستان میں بارہویں جماعت کے تمام تعلیمی شعبوں کے مقررہ حتمی امتحانات اور گیارہویں جماعت کے بعض امتحانات ملتوی کر دیے گئے ہیں۔

وزارت کا کہنا ہے کہ ملتوی کیے گئے امتحانات کی نئی تاریخوں کا اعلان بعد میں کیا جائے گا۔

حکام کے مطابق یہ فیصلہ ملک کی موجودہ غیر معمولی صورتحال کے باعث کیا گیا ہے تاکہ طلبہ اور امتحانی عملے کی حفاظت کو یقینی بنایا جا سکے۔

یاد رہے کہ حالیہ دنوں میں ایران کے جنوبی علاقوں میں سیکیورٹی صورتحال کشیدہ رہی ہے، جس کے باعث مختلف انتظامی اور تعلیمی سرگرمیوں پر بھی اثرات مرتب ہوئے ہیں۔