یمنی حوثیوں کے ترجمان اور سعودی وفد کی عمان میں اہم ملاقات

یمن کے حوثی گروپ (انصار اللہ) کے ترجمان اور سعودی وفد کے درمیان عمان میں اہم ملاقات ہونے کی اطلاعات سامنے آئی ہیں، جس میں خطے کی موجودہ صورتحال، کشیدگی میں کمی اور علاقائی امن و استحکام سے متعلق امور پر تبادلہ خیال کیا گیا۔

عرب میڈیا کے مطابق اس ملاقات میں اقوام متحدہ، سعودی عرب اور انصار اللہ کے نمائندوں نے بھی شرکت کی۔ ذرائع کا کہنا ہے کہ مذاکرات کا مقصد خطے میں امن کو فروغ دینا اور جاری تنازعات کے حل کے لیے سفارتی کوششوں کو آگے بڑھانا تھا۔

رپورٹس کے مطابق فریقین نے کشیدگی کم کرنے، اعتماد سازی اور ممکنہ سیاسی پیش رفت پر بھی تبادلہ خیال کیا، جبکہ مذاکرات کے دوسرے دور کے انعقاد کا بھی امکان ظاہر کیا جا رہا ہے۔

تاحال ملاقات کے حوالے سے سعودی عرب، حوثی قیادت یا اقوام متحدہ کی جانب سے باضابطہ اعلامیہ جاری نہیں کیا گیا، تاہم مبصرین اس پیش رفت کو خطے میں سفارتی کوششوں کے لیے اہم قرار دے رہے ہیں۔