کراچی: میر رضا علی قتل کیس میں پیشرفت، مقروض ہونے کا انکشاف

پاکستان ایمپلائز ہاؤسنگ سوسائٹی (پی ای سی ایچ ایس) کراچی کے رہائشی میر رضا علی کی موت کی تفتیش میں پیش رفت ہوئی ہے۔

تفتیشی ذرائع کا کہنا ہے کہ ابتدائی میڈیکل رپورٹ کے مطابق میر رضا کو گولی سینے پر لگی، تحقیقات میں یہ بھی دیکھا جا رہا ہے کہ گولی شاید پیچھے سے لگی۔

ابتدائی تفتیش کے مطابق میر رضا نے سیکیورٹی گارڈ کا اسلحہ لیا تھا، میر رضا کی لاش کی موجودگی کی اطلاع قریب موجود نرسری والے نے دی۔

تفتیشی ذرائع نے بتایا ہے کہ میر رضا کی لاش جہاں سے ملی وہاں مشکوک موٹر سائیکل سوار افراد کی موجودگی کا بھی پتہ چلا ہے، موت سے قبل میر رضا کے پاس 40 ہزار روپے تھے، گھر سے نکلتے وقت میر رضا نے 1 ہزار روپے اپنے ساتھ رکھے تھے۔

میر رضا اسمارٹ واچ، والٹ اور گاڑی گھر چھوڑ کر گیا تھا، ابتدائی تفتیش کے مطابق میر رضا مختلف لوگوں کا قرض دار بھی تھا، واقعے کے بعد سے اب تک اسلحہ اور گولی کا خول نہیں ملا۔

تفتیشی ذرائع کا کہنا ہے کہ تفتیش سے متعلق 15 سے زائد افراد کے بیانات لیے گئے ہیں، میر رضا کی میڈیکل رپورٹ آج اور موبائل فون کی فرانزک رپورٹ 1 سے 2 دن میں موصول ہو جائے گی۔