رضا کے اہلخانہ نے عدالتی کمیشن پر رضامندی ظاہر نہیں کی، جبران ناصر

میر رضا کیس میں اہلخانہ کے وکیل جبران ناصر نے کہا ہے کہ رضا کے اہل خانہ نے نہ تو کسی عدالتی کمیشن کے قیام کی کوئی درخواست کی اور نہ ہی رضا مندی ظاہر کی ہے۔

وکیل جبران ناصر نے کہنا ہے کہ اس مرحلے پر ہمیں کسی عدالتی کمیشن کے قیام کی کوئی ضرورت نہیں ہے۔ 

انہوں نے کہا کہ ایک نئی تفتیشی ٹیم تشکیل دی گئی ہے جس سے اہل خانہ آج ملاقات کریں گے۔ 

میر رضا کے والد کے وکیل جبران ناصر نے کہا کہ سندھ حکومت “سہولت کاری” کے نام پر رکاوٹیں یا الجھنیں پیدا کرنے کی کوشش نہ کرے۔

واضح رہے کہ سندھ حکومت نے گزشتہ روز میر رضا کیس کی تحقیقات کے لیے جوڈیشل کمیشن بنانے کا اعلان کیا اور اس سلسلے میں چیف جسٹس سندھ ہائی کورٹ کو خط آج ارسال کیا جائے گا۔

وزیر داخلہ سندھ ضیا لنجار نے جیو نیوز کے پروگرام ’نیا پاکستان‘ میں بتایا کہ تمام حقائق جوڈیشل کمیشن کے سامنے آجائیں گے، ابھی تک ایسی کوئی بات سامنے نہیں آئی کہ قتل کے پیچھے کوئی ہائی پروفائل شخصیت ہے۔

ضیا لنجار نے پولیس سرجن ڈاکٹر سمعیہ کو بھی پھر سے ہدف تنقید بنایا، کہا ان کی وجہ سے سندھ حکومت کی بدنامی ہوئی، اگر پوسٹ مارٹم رپورٹ میں خامیاں تھیں تو میڈیا میں جانے کے بجائے ڈاکٹر سمعیہ کو سندھ حکومت کو آگاہ کرنا چاہیے تھا۔

وزیر داخلہ سندھ کا کہنا تھا کہ سی سی پی او کراچی نے کسی جگہ پر میر رضا کی خودکشی کا دعویٰ نہیں کیا، ہو سکتا ہے کسی نچلی سطح کے افسر نے یہ بات کردی ہو۔