امتحانات میں فیل ہونے پر لڑکا دلبرداشتہ ہوکر گھر چھوڑ کر لاہور سے کراچی پہنچ گیا

کراچی (پی این پی) ڈسٹرکٹ ساؤتھ پولیس نے لاہور سے لاپتا 14 سالہ لڑکے کو کراچی سے بحفاظت بازیاب کرالیا۔

نجی ٹی وی چینل ’’ ایکسپریس نیوز‘‘ کے مطابق ابتدائی معلومات میں انکشاف ہوا ہے کہ لڑکا امتحانات میں فیل ہونے پر دل برداشتہ ہو کر گھر سے نکل گیا تھا اور لاہور سے کراچی آ گیا تھا، بچے کے والدین کی جانب سے لاہور میں گمشدگی کا مقدمہ بھی درج کروایا گیا تھا، تھانہ آرٹلری میدان پولیس نے بروقت کارروائی کرتے ہوئے بچے کو تلاش کر کے بحفاظت بازیاب کیا ضروری قانونی کارروائی مکمل کرنے کے بعد بچے کو اس کے والدین کے حوالے کر دیا گیا۔

بچے کی بحفاظت بازیابی پر والدین نے خوشی کا اظہار کرتے ہوئے ڈسٹرکٹ ساؤتھ پولیس کراچی، ایس پی ڈسٹرکٹ ساؤتھ مہزور علی اور ایس ایچ او تھانہ آرٹلری میدان کامران اشعر کا دلی شکریہ ادا کیا۔

ترجمان ڈسٹرکٹ ساؤتھ پولیس کا کہنا ہے کہ ڈسٹرکٹ ساؤتھ پولیس کراچی شہریوں کی جان و مال کے تحفظ کے لیے اپنی ذمہ داریاں بھرپور انداز میں انجام دے رہی ہے۔