اسرائیل اسلام آباد مفاہمتی یادداشت کو سبوتاژ کرنے کی کوشش کر رہا ہے: عباس عراقچی

تہران: ایرانی وزیر خارجہ عباس عراقچی نے الزام عائد کیا ہے کہ اسرائیل اسلام آباد مفاہمتی یادداشت کو ناکام بنانے کے لیے سرگرم ہے۔

تہران میں ایک تقریب سے خطاب کرتے ہوئے عباس عراقچی نے کہا کہ امریکا ایران سے غیر مشروط طور پر سرنڈر کروانے کے مقصد میں کامیاب نہیں ہوسکا۔ ان کے مطابق ایران کی جانب سے مزاحمت کے باعث مخالف فریق اپنے بیشتر اہداف حاصل نہیں کرسکا۔

ایرانی وزیر خارجہ نے دعویٰ کیا کہ ایران میں حکومت کی تبدیلی اور ملک کو تقسیم کرنے کی کوششیں بھی کامیاب نہیں ہوئیں۔ ان کے مطابق جنگ شروع ہونے کے کچھ ہی عرصے بعد مخالف فریق نے مذاکرات کی خواہش ظاہر کی، جس کے بعد ایران نے اپنی شرائط کے تحت جنگ بندی اور مذاکرات پر آمادگی ظاہر کی۔

عباس عراقچی کا کہنا تھا کہ مذاکرات کے دوران بھی ایران نے اپنی طاقت اور اعتماد کا مظاہرہ کیا۔ ان کے مطابق طے پانے والے سمجھوتے کی متعدد شقیں ایران کے مفاد میں تھیں اور اس سفارتی پیش رفت کو صرف وزارت خارجہ یا کسی ایک فرد کی کامیابی قرار نہیں دیا جاسکتا۔

انہوں نے کہا کہ یہ کامیابی ایرانی عوام کی ہے، جنہوں نے مشکل حالات میں ملک کا ساتھ دیا۔

ایرانی وزیر خارجہ نے عالمی سیاست میں طاقت کی اہمیت پر بھی بات کی اور کہا کہ موجودہ عالمی نظام میں کسی بھی ملک کی پوزیشن اس کی طاقت سے جڑی ہوئی ہے۔ ان کے مطابق ایران اور مخالف فریق کے درمیان حالیہ تنازع میں ایرانی میزائل صلاحیت نے اہم کردار ادا کیا۔

عباس عراقچی نے مزید الزام عائد کیا کہ اسرائیل اسلام آباد میں ہونے والی مفاہمتی کوششوں کو سبوتاژ کرنے کی کوشش کر رہا ہے، تاہم انہوں نے اس دعوے کے حوالے سے مزید تفصیلات فراہم نہیں کیں۔