ایرانی فوج کا دفاعی سے جارحانہ عسکری حکمت عملی اپنانے کا اعلان

ایرانی فوج نے کہا ہے کہ حالیہ جنگوں کے تجربات کے بعد ملک کی عسکری حکمت عملی میں نمایاں تبدیلی آئی ہے اور دفاعی طرزِ فکر کے بجائے جارحانہ انداز کو زیادہ اہمیت دی جا رہی ہے۔

ایرانی فوج کے ترجمان بریگیڈیئر جنرل محمد اکرمنیہ کے مطابق یہ تبدیلی بتدریج 12 روزہ اور 40 روزہ جنگوں کے دوران سامنے آئی۔ ان کا کہنا تھا کہ ماضی میں ایران کی فوجی حکمت عملی بنیادی طور پر دفاع پر مرکوز تھی، تاہم حالیہ تنازعات کے تجربات نے اسے زیادہ فعال اور جارحانہ ردعمل کی طرف منتقل کیا ہے۔

ایرانی ترجمان کے مطابق نئی حکمت عملی میں کسی حملے کا تیز اور وسیع جواب دینے کے ساتھ ساتھ بعض ممکنہ خطرات کے خلاف پیشگی اقدامات پر بھی توجہ شامل ہے۔

انہوں نے اس پالیسی میں تبدیلی کی مثال دیتے ہوئے کہا کہ ایرانی فوج نے ایک منصوبہ بھی تیار کیا ہے، جس کے تحت ایرانی سرزمین میں زمینی دراندازی کرنے والے امریکی فوجیوں کو ہلاک یا گرفتار کرنے کی صورت میں انعامات دینے کی تجویز شامل ہے۔

ایرانی حکام کا کہنا ہے کہ عسکری حکمت عملی میں یہ تبدیلی حالیہ جنگوں سے حاصل ہونے والے تجربات اور مستقبل میں ممکنہ خطرات سے نمٹنے کی تیاری کا حصہ ہے۔