ریاض ایئرپورٹ پر دو روز میں دوسرا میزائل حملہ، ایک پاکستانی جاں بحق

سعودی عرب کی جنرل اتھارٹی آف سول ایوی ایشن کے مطابق دارالحکومت ریاض کے شاہ خالد بین الاقوامی ایئرپورٹ پر ہونے والے پروجیکٹائل حملے کے نتیجے میں ایک پاکستانی شہری جاں بحق ہو گیا ہے۔

سول ایوی ایشن اتھارٹی کے جاری کردہ اعلامیے کے مطابق اس حملے کے باعث مزید 11 افراد زخمی بھی ہوئے ہیں جنہیں فوری طور پر ضروری طبی امداد کی فراہمی کے لیے ہسپتال منتقل کر دیا گیا ہے۔

سرکاری ذرائع کے مطابق حملے سے ایئرپورٹ کی تنصیبات اور مادی املاک کو بھی نقصان پہنچا ہے جس کا تخمینہ لگانے کا عمل فی الوقت جاری ہے۔ متعلقہ سکیورٹی اداروں اور ہنگامی امدادی ٹیموں نے فوری کارروائی کرتے ہوئے صورتحال پر قابو پا لیا ہے جبکہ مسافروں اور ایئرپورٹ عملے کی حفاظت کو یقینی بنانے کے لیے تمام ضروری اقدامات کیے جا رہے ہیں۔

ذرائع کے مطابق اس ہفتے ایئرپورٹ پر ہونے والے ان حملوں کے بعد فضائی آپریشن عارضی طور پر متاثر ہوا اور حفاظتی اقدامات کے پیش نظر پروازیں متبادل ایئرپورٹس کی طرف موڑی گئیں۔ حکام کا کہنا ہے کہ صورتحال کا باریک بینی سے جائزہ لیا جا رہا ہے اور جلد ہی تمام تر معمول کی فضائی سرگرمیاں بحال کر دی جائیں گی۔