راولپنڈی(نیوزڈیسک)چیف آف آرمی سٹاف جنرل عاصم منیر سے پنجاب پولیس کی اسسٹنٹ سپریٹنڈنٹ پولیس ( اے ایس پی ) شہربانو نقوی نے ملاقات کی ہے۔
بدھ کے روز آرمی چیف جنرل سید عاصم منیر سے اے ایس پی شہربانو نقوی کی ملاقات ہوئی جس کے دوران آرمی چیف نے خاتون پولیس آفیسر کی پیشہ ورانہ مہارت کا مظاہرہ پیش کرنے پر تعریف کی۔
آرمی چیف کا کہنا تھا کہ پاکستانی خواتین زندگی کے تمام شعبوں میں اہم کردار ادا کر رہی ہیں اور انہوں نے اپنی قابلیت، استقامت اور عزم کی وجہ سے خود کو ممتاز کیا، خواتین پاکستانی معاشرے کا ایک انمول حصہ ہیں۔
جنرل عاصم منیر کا کہنا تھا کہ ان کا احترام ہمارے مذہب کے ساتھ ساتھ ہماری معاشرتی اقدار میں بھی شامل ہے۔
اس موقع پر آرمی چیف نے عدم برداشت کو روکنے کے لیے ملک گیر اتفاق رائے کی ضرورت پر بھی زور دیا۔
ان کا کہنا تھا کہ تحفظات کے حل کے لیے قانونی راستے میسر ہوتے ہوئے قانون کو ہاتھ میں نہ لیا جائے، بدعت کی بنیاد پر من مانی کارروائیاں معاشرے کے نقطہ نظر کو کمزور کرتی ہیں۔
ملاقات کے دوران آرمی چیف نے اسلام کے حسن سلوک اور احسان کے ابدی پیغام پر بھی روشنی ڈالی۔
