پہلگام حملہ بھارتی سازش، فالس فلیگ آپریشن سے دنیا کو گمراہ نہیں کیا جا سکتا: ڈاکٹر شوکت علی

اسلام آباد/برمنگھم: پاکستان مسلم لیگ (ق) برطانیہ کے جنرل سیکرٹری ڈاکٹر شوکت علی نے کہا ہے کہ پہلگام حملہ بھارت کی ایک سازش ہے جس کے ذریعے وہ دنیا کی آنکھوں میں دھول جھونکنا چاہتا ہے۔ اپنے بیان میں انہوں نے بھارتی فالس فلیگ آپریشن پر شدید ردعمل کا اظہار کرتے ہوئے کہا کہ بھارت ان جھوٹے واقعات کے ذریعے عالمی برادری کو گمراہ نہیں کر سکتا۔
ڈاکٹر شوکت علی نے کہا کہ بھارت کشمیر میں انسانی حقوق کی خلاف ورزیاں چھپانے کے لیے اس قسم کے ڈرامے رچا رہا ہے، مگر اس کے فالس فلیگ آپریشنز سے اس کا مکروہ چہرہ دنیا کے سامنے آ چکا ہے۔ انہوں نے کہا کہ بھارت امن کا دشمن ہے، لیکن پاکستان کا دفاع ناقابل تسخیر ہے۔ پوری قوم اپنی مسلح افواج کے ساتھ کھڑی ہے اور وطن کا دفاع ہر قیمت پر یقینی بنایا جائے گا۔
انہوں نے مزید کہا کہ پاکستان کی بحری، بری اور فضائی افواج ہر قسم کے خطرات سے نمٹنے کی مکمل صلاحیت رکھتی ہیں۔ بھارتی ریاستی دہشت گردی کا اصل چہرہ دنیا کو دکھانا ہوگا، بھارت کو دو طرفہ معاہدوں کا احترام کرنا چاہیے، خاص طور پر سندھ طاس معاہدے کی معطلی ایک غیر منصفانہ اور بلاجواز اقدام ہے۔