چوہدری سالک حسین کے خلاف جعلی ویڈیو کلپ ایک سازشی ایجنڈے کا حصہ ہے، مسلم لیگ (ق) اسلام آباد کا مؤقف

پاکستان مسلم لیگ (ق) اسلام آباد کیپٹل کے رہنماؤں کی پارٹی رہنما چوہدری سالک حسین کے خلاف من گھڑت ویڈیو پر شدید مذمت
پاکستان مسلم لیگ (ق) اسلام آباد کیپٹل کے صدر سردار رضوان صادق خان، جنرل سیکرٹری چوہدری جہانگیر اور سیکرٹری اطلاعات و نشریات انجینئر مطیع اللہ خان نے سوشل میڈیا پر وفاقی وزیر اوورسیز پاکستانیز و سینئر نائب صدر پاکستان مسلم لیگ چوہدری سالک حسین کے خلاف جاری کیے گئے من گھڑت ویڈیو کلپ کی شدید مذمت کی ہے۔
یہ ویڈیو جو ایک سال پرانی کلپ کو توڑ مروڑ کر گمراہ کن انداز میں پیش کی گئی، ایک سازشی ایجنڈے کا حصہ ہے جس کا مقصد عوام میں غلط فہمیاں اور انتشار پھیلانا ہے۔ پارٹی قیادت نے واضح کیا کہ چوہدری سالک حسین کی فلسطین سے متعلق پالیسی ہمیشہ دوٹوک اور اصولی رہی ہے اور وہ ہر عالمی فورم پر مظلوم فلسطینی عوام کی حمایت میں آواز بلند کرتے رہے ہیں۔
رہنماؤں نے کہا کہ ہم ان عناصر کی شدید مذمت کرتے ہیں جو بیرون ملک بیٹھ کر ایڈیٹنگ کے ذریعے جھوٹا پراپیگنڈا پھیلا رہے ہیں- پاکستان مسلم لیگ (ق) واضح طور پر اعلان کرتی ہے کہ اسرائیل کو تسلیم کروانے کی کوئی سازش کامیاب نہیں ہوگی۔ اور پاکستان ہمیشہ فلسطین کے ساتھ کھڑا رہے گا۔