دنیا بھر کے 90 فیصد سے زائد انٹرنیٹ صارفین کی امریکہ اور اسرائیل کی ایران پر حملے کی مذمت، سروے
تہران :امریکہ اور اسرائیل نے ایران پر مشترکہ فوجی کارروائی کی جس میں ایران کے اعلی رہنما آیت اللہ علی خامنہ ای شہید ہو گئے۔ ایران نے مشرق وسطی میں امریکی فوج کے متعدد اڈوں اور اسرائیل کے متعلقہ اہداف پر جوابی حملے کیے، جس سے خطے کی صورتحال شدید بگڑ گئی۔ چائنا میڈیا گروپ کے تحت سی جی ٹی این کے عالمی ناظرین کے لیے کیے گئے ایک سروے کے مطابق 93.9 فیصد شرکاء نے امریکہ اور اسرائیل کی جانب سے ایران پر فوجی کارروائی کی مذمت کی، اور اسے ایران کی خودمختاری، سلامتی اور علاقائی سالمیت کی خلاف ورزی قرار دیا، اور فوری طور پر فوجی کارروائی بند کرنے اور کشیدگی کو مزید بڑھنے سے روکنے کا مطالبہ کیا۔سروے میں، 86.8 فیصد شرکاء نے ایران کے ساتھ مذاکرات کے دوران امریکہ کی فوجی کارروائیوں پر تنقید کی اور اسے “امریکی بالادستی” کی عکاسی قرار دیا۔ 90 فیصد شرکاء نے خدشہ ظاہر کیا کہ پہلے ہی نازک صورتحال سے دوچار مشرق وسطی میں قیام امن کا عمل مزید خراب ہو جائے گا۔ اس کے علاوہ 94.7 فیصد شرکاء کا خیال ہے کہ “امریکی بالادستی” سے بین الاقوامی قوانین اور بین الاقوامی تعلقات کے ضوابط کی خلاف ورزی ہوئی ہے، جس سے عالمی برادری کا کثیر الجہتی نظام پر اعتماد کم ہو گا اور عالمی اسٹریٹجک استحکام متاثر ہوگا۔