چین کا مشرق وسطیٰ کی موجودہ صورتحال پر گہری تشویش کا اظہار

بیجنگ : چینی وزارت خارجہ کے ترجمان گو جیاکھون نے یومیہ پریس کانفرنس میں مشرق وسطیٰ کی موجودہ صورتحال پر چین کی جانب سے گہری تشویش کا اظہار کرتے ہوئے کہا کہ حالیہ دنوں چینی وزیر خارجہ وانگ ای نے متعدد ممالک کے وزرائے خارجہ کے ساتھ الگ الگ ٹیلیفونک بات چیت کی اور علاقائی صورتحال پر گہرائی سے تبادلہ خیال کیا۔ مشرق وسطیٰ کے امور کے لیے چین کے خصوصی ایلچی زائی جون بھی اس وقت مشرق وسطیٰ کے دورے پر ہیں۔ طویل جنگ اور بڑھتا ہوا تنازعہ کسی بھی فریق کے مفاد میں نہیں ہے ۔ چین کشیدگی کو کم کرنے کے لیے تنازعے میں شریک تمام متعلقہ فریقوں کے ساتھ رابطے کو برقرار رکھے گا، ثالثی کو مضبوط بنائے گا اور اتفاق رائے پیدا کرنے کی کوشش جاری رکھےگا۔ ترجمان کا کہنا تھا کہ تمام فریقوں کی مشترکہ کوششوں کی بدولت دس ہزار سے زائد چینی سیاح متحدہ عرب امارات، عمان اور سعودی عرب سمیت دیگر خلیجی ممالک سے بحفاظت اور منظم طریقے سے واپس چین لوٹ چکے ہیں۔ متعلقہ ممالک میں چینی سفارت خانے اور قونصل خانے ان ممالک میں موجود چینی شہریوں کو ضروری مدد فراہم کرنے کی بھرپور کوشش کر رہے ہیں۔