لوگوں کے چاچا بولنے کو انجوائے کرتا ہوں، افتخار احمد

پاکستان سپر لیگ (پی ایس ایل) فرنچائز پشاور زلمی کے آل راؤنڈر افتخار احمد نے کہا ہے کہ لوگوں کے چاچا بولنے کو انجوائے کرتا ہوں۔

لاہور میں جیو نیوز سے گفتگو میں افتخار احمد نے کہا کہ ڈومیسٹک کرکٹ میں کافی زیادہ بولنگ کی اور تیاری کافی اچھی تھی۔

انہوں نے کہا کہ بیٹنگ کے ساتھ بولنگ پر زیادہ کام کیا، لوگوں کی محبت ہے کہ وہ چاچا بولتے ہیں اور میں انجوائے کرتا ہوں۔

زلمی آل راؤنڈر نے مزید کہا کہ مڈل آرڈر میں فرحان یوسف، اوپنر میں سمیر منہاس اور بولنگ میں علی رضا اس سیزن میں اچھا کھیل رہے ہیں اور وہ پاکستان کے لیےلمبا کھیل سکتے ہیں۔

ان کاکہنا تھا کہ پشاور کی مینجمنٹ نے کمبی نیشن بہت اچھا بنایا، ہمارے پاس ڈگ آؤٹ میں بھی اچھے کھلاڑی بیٹھے ہیں، ہم نے اپنی کرکٹ کھیلنی ہے جیسے کھیلتے آرہے ہیں۔

افتخار احمد نے یہ بھی کہا کہ کوشش ہوگی کہ لاہور کے خلاف بھی میچ جیتیں اور مورال ہائی رکھیں، ڈومیسٹک کرکٹ کے فٹنس ٹیسٹ میں سب سے اچھی فٹنس تھی اور 85 فیصد رزلٹ تھا۔

انہوں نے کہا کہ کوشش یہی ہے کہ پاکستان کے لیے کھیلوں اور ابھی مزید 7، 8 سال تک کھیل سکتا ہوں۔