بہنوں کی کمال بہادری نے گوجرانوالہ میں 16 سالہ لڑکی کے اغواء کی سنسنی خیز کوشش ناکام بنادی

گوجرانوالہ (پی این پی) گوجرانوالہ کے مصروف مرکزی بازار میں دن کی روشنی میں ایک 16 سالہ لڑکی کو اغوا کرنے کی کوشش ناکام بنا دی گئی۔

واقعے کی سی سی ٹی وی فوٹیج بھی سامنے آ گئی ہے، جس میں متاثرہ لڑکی کی بہنوں کو غیر معمولی جرات اور بہادری کا مظاہرہ کرتے ہوئے دیکھا جا سکتا ہے۔

اطلاعات کے مطابق نوعمر لڑکی اپنی دو بہنوں کے ساتھ بازار سے گزر رہی تھی کہ اسی دوران ایک کار ان کے قریب آ کر رکی۔ گاڑی سے نکلنے والے نقاب پوش شخص نے اچانک لڑکی کو زبردستی گاڑی میں بٹھانے کی کوشش کی اور اسے بالوں سے پکڑ کر گھسیٹنے لگا۔

اس اچانک پیش آنے والے واقعے پر لڑکی کی دونوں بہنوں نے خوفزدہ ہونے کے بجائے بھرپور مزاحمت کی۔ انہوں نے ملزم کا ڈٹ کر مقابلہ کیا اور اپنی بہن کو بچانے کے لیے اغوا کار سے الجھ گئیں۔

سی سی ٹی وی ویڈیو میں دیکھا جا سکتا ہے کہ بہنوں کی شدید مزاحمت کے باعث ملزم اپنا منصوبہ مکمل نہ کر سکا۔ صورتحال بگڑتے دیکھ کر وہ فوری طور پر گاڑی میں سوار ہوا اور اپنے ساتھیوں کے ہمراہ موقع سے فرار ہو گیا۔

واقعے کی ویڈیو منظر عام پر آنے کے بعد گوجرانوالہ پولیس نے فوری کارروائی شروع کر دی ہے۔ پولیس حکام کے مطابق مقدمہ درج کر لیا گیا ہے اور سی سی ٹی وی فوٹیج کی مدد سے گاڑی اور ملزمان کی شناخت کا عمل جاری ہے۔

پولیس کا کہنا ہے کہ ملزمان کی گرفتاری کے لیے مختلف علاقوں میں چھاپے مارے جا رہے ہیں اور جلد انہیں قانون کے کٹہرے میں لایا جائے گا۔

🚨🚨
گوجرانوالہ میں دو بہنوں نے چھوٹی بہن کے اغوا کی کوشش ناکام بنا دی pic.twitter.com/8resYtIRUL

— Ali Tanoli (@alitanoli889) June 24, 2026