مسلم لیگ (ن) کے سینئر رہنما و سابق وزیر دفاع خواجہ آصف نے سانحہ جڑانوالہ پرمسیحی برادری سے معافی مانگ لی ہے۔
تفصیلات کے مطابق سیالکوٹ میں مسیحیوں کے ایک بڑے جلسے سے خطاب کرتے ہوئے خواجہ آصف نے کہا کہ سیالکوٹ کے مسلمان اور مسیحی برادری دہائیوں سے نہیں بلکہ صدیوں سے اس شہر اور اس ملک کی خدمت کر رہی ہے۔ انہوں نے کہا کہ یہاں عالیشان چرچ اور عبادت گاہیں موجود ہیں جو اس بات کی شہادت دیتی ہیں کہ اس شہر میں تمام برادریاں امن کے ساتھ رہ رہی ہیں۔
خواجہ آصف نے اپنے خطاب کے اختتام پر شرکا سے کہا کہ وہ جڑانوالہ کے واقعات پر اپنی، اپنی پارٹی اور سیالکوٹ کے باسیوں کی طرف سے آپ (مسیحیوں) سے معافی مانگتا ہیں۔
انہوں نے کہا کہ ہم سے کوتاہی ہوئی ہے اور انشاء اللہ تعالیٰ آنے والے وقتوں میں اس بات کو یقینی بنایا جائے گا کہ آپ لوگ تحفظ اور خوشی کے ساتھ اس سرزمین پرآباد رہیں۔ یہ آپ کی سرزمین ہے، یہاں مسلمانوں کی طرح آپ کی عبادت گاہیں اور آبادیاں آباد رہیں۔ یہ ہم سب پر فرض ہے کہ ان تمام عبادت گاہوں جن میں اللہ کا نام لیا جاتا ہے کی حفاظت ہم سب مل جل کر کریں۔’
