برطانیہ: اسلامی اجتماع کو نشانہ بنائے جانے کا منصوبہ ، 12 افراد گرفتار

لندن: برطانوی پولیس نے انتہا پسند دائیں بازو کے حملوں کے خطرے پر 12 افراد کو گرفتار کر لیا۔

پولیس کے مطابق اسلامی اجتماع کو مبینہ طور پر نشانہ بنائے جانے کے خطرے پر گرفتاریاں کی گئی ہیں۔ یہ گرفتاریاں انتہا پسند دائیں بازو کی دہشت گردی سے متعلق تحقیقات کے سلسلے میں کی گئیں۔

پولیس نے بتایا کہ 8 افراد دہشت گردی ایکٹ کے تحت، 3 قتل کی سازش کے شبے میں اور ایک خاتون کو مجرم کی مدد کرنے کے شبے میں گرفتار کیا گیا۔ ان گرفتار افراد کی عمریں 27 سے 60 سال کے درمیان ہیں۔

پولیس کا کہنا ہے کہ گرفتاریاں اتوار اور پیر کے روز انگلینڈ میں مختلف مقامات پر کی گئیں۔ مشرقی انگلینڈ، مانچسٹر اور لندن کے قریب متعدد مقامات کی تلاشی لی جا رہی ہے۔

پولیس کے مطابق حکام کو مذہبی تقریب کے حوالے سے ممکنہ سنگین خطرے کا علم ہوا تھا، مذہبی تقریب مشرقی انگلینڈ کے علاقے سفوک میں 9 سے 12 جولائی تک منعقد ہوئی جس میں تقریباً 15 ہزار افراد شریک تھے۔

تقریب کو اتوار کے روز مقررہ وقت سے پہلے ختم کر دیا گیا تھا، برطانیہ نے اپریل میں دہشت گردی کے خطرے کی سطح بڑھا کر شدید کر دی تھی۔

ادھر برطانوی وزیر داخلہ شبانہ محمود نے اپنے بیان میں کہا ہے کہ ہمیں نفرت کے خلاف کھڑا ہونا ہوگا۔