لبنان کی خودمختاری پر کوئی سمجھوتہ نہیں، مجتبیٰ خامنہ ای سے منسوب خط میں پیغام

تہران: ایرانی میڈیا میں شائع ہونے والے مجتبیٰ خامنہ ای سے منسوب ایک خط میں کہا گیا ہے کہ لبنان کی علاقائی سالمیت اور خودمختاری کا تحفظ ایران اور امریکا کے درمیان کسی بھی مفاہمت کی بنیادی شرط ہے۔

رپورٹس کے مطابق یہ خط حزب اللہ کے رہنما کے نام ارسال کیے گئے ایک مکتوب کے جواب کے طور پر سامنے آیا ہے، جس میں لبنان کی صورتحال اور خطے میں جاری کشیدگی پر ایران کے مؤقف کا اظہار کیا گیا ہے۔

ایرانی میڈیا کے مطابق خط میں کہا گیا ہے کہ ایران، علی خامنہ ای کی پالیسی کے تحت، لبنان میں حزب اللہ کی حمایت کو اپنی اسٹریٹجک پالیسی کا حصہ سمجھتا ہے اور اسے اسرائیل کے خلاف سرگرم گروہوں میں اہم کردار کا حامل قرار دیتا ہے۔

خط میں یہ بھی کہا گیا ہے کہ لبنان کی علاقائی سالمیت کا تحفظ اور لبنانی سرزمین سے اسرائیلی افواج کا مکمل اور غیر مشروط انخلا، ایران اور امریکا کے درمیان جاری کشیدگی کے خاتمے کے لیے کسی بھی ممکنہ مفاہمت کی پہلی شرط ہے۔

رپورٹس کے مطابق 28 فروری 2026 کو سابق ایرانی رہبر اعلیٰ علی خامنہ ای اور ان کے اہل خانہ کی رہائش گاہ پر مبینہ امریکی اور اسرائیلی حملے کے بعد مجتبیٰ خامنہ ای کی جانب سے کوئی عوامی تصویر یا ویڈیو پیغام سامنے نہیں آیا، تاہم حالیہ خط کو ان سے منسوب کیا جا رہا ہے۔

اس خط کی آزاد ذرائع سے تصدیق نہیں ہو سکی، جبکہ اس حوالے سے ایران یا دیگر متعلقہ فریقوں کی جانب سے باضابطہ ردعمل بھی سامنے نہیں آیا ہے۔