ورلڈکپ سے قبل بڑا فیصلہ، عماد بٹ کو قیادت سے ہٹادیا گیا، ابوبکر نئے کپتان مقرر

پاکستان ہاکی فیڈریشن (پی ایچ ایف) نے ورلڈ کپ سے قبل عماد بٹ کو پاکستان ہاکی ٹیم کی کپتانی سے ہٹادیا جبکہ ابوبکر کو ٹیم کا نیا کپتان بنادیا گیا ہے۔ 

ابوبکر کوریا کے خلاف ہوم سیریز میں قومی ٹیم کی قیادت کریں گے، پی ایچ ایف کے صدر محی الدین وانی نے یہ فیصلہ ڈولپمنٹ کمیٹی کی سفارش پر کیا۔

ہاکی ورلڈ کپ سے قبل پاکستان ہاکی فیڈریشن نے بڑا فیصلہ کرتے ہوئے عماد بٹ کو کپتانی سے سبکدوش کردیا گیا اور ابوبکر کو پاکستان ہاکی ٹیم کا نیا کپتان نامزد کردیا۔

پی ایچ ایف کے مطابق ابوبکر آنے والے بین الاقوامی مقابلوں میں قومی ٹیم کی قیادت کریں گے۔

پاکستان ہاکی فیڈریشن کے صدر محی الدین احمد وانی نے پروفیشنل ڈیولپمنٹ کمیٹی کی سفارش پر یہ فیصلہ کیا، پی ایچ ایف کے مطابق عماد شکیل بٹ بطور سینئر کھلاڑی ٹیم کا حصہ رہیں گے۔

پی ایچ ایف نے اس امید کا اظہار کیا ہے کہ ابو بکر کی قیادت میں، سینئر کھلاڑیوں کے تجربے اور نوجوان کھلاڑیوں کی صلاحیتوں کی بدولت، ٹیم ایک متحد اور مضبوط انداز میں آگے بڑھے گی۔

ابوبکر 30 جولائی سے کوریا کے خلاف شروع ہونے والی ہوم سیریز میں ٹیم کی قیادت کریں گے۔

خیال رہے کہ ایف آئی ایچ ہاکی ورلڈ کپ 15 اگست سے شروع ہوگا، نیدرلینڈز اور بیلجیئم میگا ایونٹ کے مشترکہ میزبان ممالک ہوں گے۔

ایونٹ میں 16 ٹیمیں شریک ہوں گی جنہیں 4، 4 ٹیموں کے چار گروپس میں تقسیم کیا گیا ہے۔

پاکستان ٹیم گروپ ڈی میں انگلینڈ، ویلز اور روایتی حریف بھارت کے مد مقابل ہوگی۔ پاکستان اور بھارت کے درمیان میچ 19 اگست کو کھیلا جائے گا۔