جنوبی کوریا کے لیے 125 ملین ڈالر کا امریکی دفاعی پیکج منظور

امریکا نے جنوبی کوریا کو تقریباً 125 ملین ڈالر مالیت کے جدید فضائی میزائل اور فوجی سازوسامان فروخت کرنے کی ممکنہ منظوری دے دی ہے۔

امریکی حکام کے مطابق مجوزہ دفاعی پیکج کا مقصد جنوبی کوریا کی فضائی دفاعی صلاحیت کو مزید مضبوط بنانا اور ممکنہ علاقائی خطرات سے نمٹنے کے لیے اس کی دفاعی تیاری بہتر کرنا ہے۔

جنوبی کوریا کی جانب سے اے آئی ایم 9 ایکس سائیڈ ونڈر بلاک 103 میزائلوں کے ساتھ 10 ٹیکٹیکل گائیڈنس یونٹس کی خریداری کی درخواست کی گئی تھی۔ یہ میزائل جنگی طیاروں سے فضائی اہداف کو نشانہ بنانے کے لیے استعمال کیے جاتے ہیں۔

اے آئی ایم 9 ایکس سائیڈ ونڈر جدید قلیل فاصلے تک مار کرنے والا ہوا سے ہوا میں مار کرنے والا میزائل ہے، جو تیز ردعمل، جدید رہنمائی نظام اور فضائی اہداف کو انتہائی پھرتی سے نشانہ بنانے کی صلاحیت رکھتا ہے۔

تاہم مجوزہ دفاعی معاہدہ ابھی حتمی مرحلے میں نہیں پہنچا۔ اس حوالے سے امریکی کانگریس کو باضابطہ اطلاع اور جائزے کا عمل بھی شامل ہے، جس کے بعد فروخت کے اگلے مراحل طے کیے جائیں گے۔

یہ پیش رفت ایسے وقت میں سامنے آئی ہے جب امریکا اور جنوبی کوریا کے درمیان دفاعی تعاون، مشترکہ فوجی مشقوں اور خطے میں بڑھتے ہوئے سیکیورٹی چیلنجز کے تناظر میں عسکری تیاری پر توجہ برقرار ہے۔