موبائل فون کا جھگڑا خاندان کو لے ڈوبا،نوجوان اور والدین پہاڑی سے گر کر ہلاک

بھارتی ریاست مہاراشٹرا کے شہر چھترپتی سمبھاجی نگر میں ایک افسوسناک واقعے کے دوران نوجوان اور اس کے والدین جان کی بازی ہار گئے، جبکہ واقعے کی ویڈیو سوشل میڈیا پر گردش کر رہی ہے۔

بھارتی میڈیا کے مطابق 19 سالہ کنال چندواڈے کا گھر میں موبائل فون کے معاملے پر اپنے والد سے مبینہ طور پر جھگڑا ہوا، جس کے بعد وہ ایک پہاڑی پر چڑھ گیا۔

رپورٹس کے مطابق اہل خانہ، مقامی افراد اور گاؤں کے سرپنچ نے نوجوان کو واپس لانے کی کوشش کی اور تقریباً تین گھنٹے تک اسے سمجھاتے رہے۔ سامنے آنے والی ویڈیو میں بھی لوگوں کو نوجوان سے بات کرتے اور اسے خطرناک مقام سے پیچھے ہٹنے پر آمادہ کرتے دیکھا جا سکتا ہے۔

एक छोटी-सी जिद… और पूरा परिवार हमेशा के लिए चला गया।

महाराष्ट्र के छत्रपति साम्भाजीनगर में 19 साल के बेटे ने मां-बाप से मोबाइल खरीदने को कहा। मां ने कहा – बेटा अभी पैसे नहीं हैं, बाद में।

इसी छोटी बात पर नाराज होकर बेटा पहाड़ी पर चढ़ गया। गांव वालों ने फायर ब्रिगेड बुलाया,… pic.twitter.com/J2pZibAiDO

— Anurag Verma ( PATEL ) (@AnuragVerma_SP) August 21, 2026

واقعے کے دوران نوجوان کے والد بھی اسے محفوظ مقام پر واپس لانے کے لیے پہاڑی پر پہنچے۔ بیٹے کو بچانے کی کوشش میں دونوں کا توازن بگڑ گیا اور وہ گہری کھائی میں جا گرے۔

واقعے کے بعد نوجوان کی والدہ بھی شدید صدمے کا شکار ہوئیں اور مبینہ طور پر پہاڑی سے نیچے گر گئیں۔ حادثے میں نوجوان اور اس کے دونوں والدین جاں بحق ہوگئے۔

پولیس اور امدادی اہلکاروں نے دشوار گزار مقام سے لاشیں نکال کر ضروری کارروائی کے لیے اسپتال منتقل کردیں۔

واقعے کی ویڈیو سامنے آنے کے بعد سوشل میڈیا صارفین نے افسوس کا اظہار کیا ہے۔ پولیس نے واقعے کے مختلف پہلوؤں کی تحقیقات شروع کردی ہیں۔