کیا پی ٹی آئی لانگ مارچ مؤخر کرنے جارہی ہے؟ آج اہم اعلان متوقع

اسلام آباد (پی این پی)وزیراعلیٰ خیبرپختونخوا سہیل آفریدی آج لانگ مارچ کے حوالے سے اہم اعلان کرنے جا رہے ہیں،

جس کے لیے وہ سہ پہر 3 بجے وزیراعلیٰ ہاؤس میں پریس کانفرنس کریں گے۔ذرائع کے مطابق پریس کانفرنس میں صوبائی کابینہ کے ارکان اور پاکستان تحریک انصاف (پی ٹی آئی) سے تعلق رکھنے والے پارلیمنٹرینز بھی وزیراعلیٰ کے ہمراہ موجود ہوں گے۔ اس موقع پر لانگ مارچ کے آئندہ لائحہ عمل سے متعلق پارٹی کا مؤقف سامنے آنے کا امکان ہے۔یہ پیش رفت ایسے وقت میں سامنے آئی ہے جب پی ٹی آئی کی قیادت نے لانگ مارچ کے شیڈول پر غور کیا ہے۔ پارٹی کے مشاورتی اجلاس میں مارچ کی تاریخ آگے بڑھانے کی تجاویز زیر بحث آئیں، تاہم حتمی فیصلہ آج کی پریس کانفرنس میں سامنے آنے کی توقع ہے۔ذرائع کے مطابق پشاور میں ہونے والے طویل مشاورتی اجلاس کے دوران لانگ مارچ سمیت دیگر سیاسی معاملات پر بھی تفصیلی تبادلہ خیال کیا گیا۔ اجلاس میں پارٹی کے مختلف صوبائی تنظیمی امور اور آئندہ کی سیاسی حکمت عملی کا بھی جائزہ لیا گیا۔

اجلاس کے شرکا کو بتایا گیا کہ پی ٹی آئی قیادت جمعیت علمائے اسلام (ف) اور پاکستان پیپلز پارٹی سمیت دیگر سیاسی جماعتوں سے رابطے میں ہے۔ پیپلز پارٹی کی جانب سے اہم معاملات پر مؤقف سامنے لانے کے لیے چیئرمین بلاول بھٹو زرداری کی وطن واپسی کا انتظار کیے جانے کی بات بھی اجلاس میں سامنے آئی۔ذرائع کا کہنا ہے کہ پی ٹی آئی قیادت 6 سے 10 اکتوبر کے درمیان آل پارٹیز کانفرنس (اے پی سی) کے انعقاد کی تجویز پر بھی غور کر رہی ہے، جبکہ دیگر اپوزیشن جماعتوں سے رابطے تیز کرنے کی تجاویز بھی زیر بحث آئیں۔مشاورتی اجلاس کے دوران محمود خان اچکزئی اور راجہ ناصر عباس کے سیاسی کردار کے حوالے سے بعض شرکا نے اپنے تحفظات بھی قیادت کے سامنے رکھے۔